Read Свето Писмо: Стандардна Библија 2006 (со девтероканонски книги) Јудита 14 Bible Online

Јудита 14 - Свето Писмо: Стандардна Библија 2006 (со девтероканонски книги) bible

Јудита 14

¹Јудита им рече: „Слушајте ме, браќа, земете ја главата и закачете ја на врвот од вашите ѕидини,

²а кога ќе се зазори и сонцето ќе изгрее на земјата, секој нека го земе своето оружје, нека излезе секој што е силен надвор од градот; дајте им повод да мислат дека слегувате во рамнината кон претстражата на асирските синови, но не слегувајте.

³Тогаш тие, откако ќе го земат своето оружје, ќе појдат во својот логор за да го разбудат војсководачот на асирската војска, ќе потрчаат кон шаторот на Олоферн и, откако нема да го најдат страв ќе ги опфати и ќе се разбегаат.

⁴Вие што живеете во сите краишта на израилската земја, гонете ги, уништувајте ги по патот на нивното бегство.

⁵Но, пред да го направите тоа, повикајте го Ахиор Амонецот да дојде кај мене; нека го види и препознае оној што сакаше да го понизи домот на Израилците, а него да го испрати кај нас во смрт.“

⁶Го повикаа Ахиор од домот на Озија. Кога дојде и ја виде главата на Олоферн во рацете на еден маж среде насобраниот народ, тој падна на земјата и ја изгуби свеста.

⁷Кога го подигнаа, тој падна пред нозете на Јудита, се поклони и рече: „Да бидеш благословена во секое Јудино живеалиште и во секој народ, секој да трепери од страхопочит кога ќе го слушне твоето име!

⁸А сега раскажи ми: што правеше во изминатите денови?“ Јудита, која беше среде народот, му раскажа сѐ што направила во тие денови — од денот кога излезе, до денот кога се врати.

⁹Кога престана да зборува, народот извика со висок глас и неговото радосно извикување се носеше по целиот град.

¹⁰А Ахиор, гледајќи го сето она што го направи Бог на Израилците, поверува искрено во Бога, прими обрезание и се присоедини кон домот израилски и остана во него дури до денешен ден.

¹¹А кога се зазори, ја закачија Олоферновата глава на ѕидините, секој го зграби своето оружје и потрчаа во одреди низ падината.

¹²Синовите асирски, кога ги здогледаа, веднаш ги известија своите началници, а тие потрчаа кај своите војсководачи и илјаданачалници, и кон сите други началници.

¹³Кога дојдоа до шаторот на Олоферн, му рекоа на оној што управуваше со неговиот имот: „Разбуди го нашиот господар, зашто оние робови се осмелија да излезат против нас на борба за да бидат уништени засекогаш.“

¹⁴Вагој влезе и почука на влезот од шаторот, бидејќи мислеше дека тој спие со Јудита.

¹⁵Но кога никој не му одговори, влезе во спалната и го најде трупот фрлен на прагот, а главата му беше отсечена.

¹⁶Извика со сиот глас, плачејќи и липајќи, и ја раскина својата облека.

¹⁷Потоа влезе во шаторот, во кој престојуваше Јудита, но не ја најде. Потоа отрча кај луѓето и извика:

¹⁸„Робовите постапиле неверно: една Еврејка го осрамоти домот на царот Навуходоносор; еве го Олоферн на земјата, а главата му ја нема.“

¹⁹Кога заповедниците на асирската војска ги слушнаа тие зборови, ги раскинаа своите облеки, нивните души се исполнија со страв, а низ целиот логор се подигна силен плач и големо ридање.