Read Свето Писмо: Стандардна Библија 2006 (со девтероканонски книги) Јудита 3 Bible Online

Јудита 3 - Свето Писмо: Стандардна Библија 2006 (со девтероканонски книги) bible

Јудита 3

¹Затоа му испратија гласници со мирољубиви предлози, кои велеа:

²„Еве, ние слугите на големиот цар Навуходоносор, паѓаме ничкум пред тебе, прави со нас што сакаш.

³Нашите куќи, нашите места, сите ниви со пченица, стадата наши и добитокот и сите наши живеалишта: служи се со нив како што сакаш.

⁴Еве, и градовите наши и нивните жители се твои слуги: дојди и постапи со нив како што ти е мило.“

⁵Дојдоа луѓе кај Олоферн и му ги соопштија тие пораки.

⁶Тогаш отиде тој во приморските места со својата војска, постави стража во нивните утврдени градови и одбра од нив силни мажи како помошна војска.

⁷А тие и целата нивна околина го пречекаа со венци, песни и свирки;

⁸тој им ги разурна сите тврдини и им ги исече нивните свети шуми, зашто нему му беше заповедано да ги уништи сите божества на таа земја, па сите народи да му служат само на единиот Навуходоносор: сите народи и сите племиња да му се обраќаат како на бог.

⁹Штом дојде кон Ездрелон, близу до Дотаим, кај големата Јудејска клисура,

¹⁰тој постави логор меѓу Гева и Скитополис и остана таму цел месец за да ја снабди својата војска со сѐ што ѝ е потребно.