Read Свето Писмо: Стандардна Библија 2006 (со девтероканонски книги) Јудита 6 Bible Online

Јудита 6 - Свето Писмо: Стандардна Библија 2006 (со девтероканонски книги) bible

Јудита 6

¹Кога стивна вревата од мажите што беа собрани на договор, Олоферн, врховниот заповедник на асирската војска, пред сите луѓе собрани од разни племиња му рече на Ахиор:

²„Ахиоре, кој си ти, ти и платениците Ефремови, што вака денес пророкуваш и што ми советуваш да отстапам, да не војувам против народот израилски, затоа што нивниот Бог ги заштитува? А кој е бог освен Навуходоносор? Тој ќе ја испрати својата сила и ќе ги избрише од лицето на земјата, а нивниот Бог нема да ги спаси.

³Ние, слугите на нашиот цар, ќе ги победиме како еден човек; тие не ќе можат да ја издржат силата на нашата коњица.

⁴Ќе ги изгазиме; горите нивни ќе ги напоиме со нивната крв; рамнините ќе ги наполниме со нивните трупови. Нема да се додржат пред нашето лице; сите ќе загинат. Така говори царот Навуходоносор, господарот на целата земја. Така говори тој, а зборовите негови не се попусто речени; тие се негова заповед.

⁵А ти, Ахиоре, амонски наемнику, ти што ги изрече овие зборови во денот на твојата неправда, нема да го гледаш моето лице од денешниов ден сѐ додека не му се одмаздам на тој народ — на тие бегалци од Египет.

⁶А кога ќе се вратам, мечот на мојата војска и народот што ми служи ќе поминат преку твоите ребра, и ти ќе паднеш меѓу ранетите Израилци.

⁷Моите робови ќе те одведат во горските предели и ќе те остават во еден од градовите на тие височини,

⁸и нема да умреш сѐ додека не бидеш заедно со нив уништен.

⁹А ако во твоето срце се надеваш дека нема да бидат поразени, знај дека ќе се посрамиш. Ти реков — сите мои зборови ќе се исполнат.“

¹⁰Тогаш Олоферн им заповеда на своите слуги, кои го чекаа во неговиот шатор, да го фатат Ахиор и да го одведат во Ветилуја, да го предадат во рацете на синовите Израилеви.

¹¹Робовите го фатија и го изведоа надвор од логорот во полето, а од полето се искачија во планинските предели и дојдоа под изворите што беа под Ветилуја.

¹²Кога ги забележаа, луѓето од градот на врвот од планината, тие го грабнаа своето оружје, излегоа од градот кој беше на врвот планински, и секој маж со праќка во рака, — го пазеа преминот и фрлаа на нив камења.

¹³А тие, откако се приближија до гората, го врзаа Ахиор, го оставија во падините на гората и се вратија кај својот господар.

¹⁴А синовите Израилеви, кои беа излегле надвор од градот, се доближија до него, го одврзаа и го одведоа во градот Ветилуја и го изведоа пред градските началници,

¹⁵кои во тоа време беа Озија, синот на Миха — од родот на Симеон, Хавриј, синот на Готониил, и Харми, синот на Мелхиил.

¹⁶Тие ги свикаа сите градски старешини, но на собранието дојдоа и сите жени и момчиња. Го ставија Ахиор среде сиот народ, а Озија го праша што се случило со него.

¹⁷Ахиор ги извести за сѐ што се случи на Олоферновото собрание, за сѐ што тој кажал пред асирските водачи и за сѐ со што се фалел Олоферн дека ќе направи против домот на Израил.

¹⁸Тогаш народот падна ничкум, Му се поклони на Бога и извика:

¹⁹„Господи, Боже небесен, погледни ја нивната горделивост и покажи милост кон понизноста на Твојот народ и погледни ги милозливо денес лицата на оние што Ти се посветени — Тебе.“

²⁰Потоа го охрабрија Ахиор и многу го пофалија.

²¹Озија го одведе Ахиор од собранието и го доведе во својот дом и направи гозба за старешините. Целата таа ноќ Го повикуваа на помош Бога на Израилците.