Read Свето Писмо: Стандардна Библија 2006 (со девтероканонски книги) Исход 1 Bible Online

Исход 1 - Свето Писмо: Стандардна Библија 2006 (со девтероканонски книги) bible

Исход 1

¹А овие се имињата на синовите Израилеви, кои дојдоа во Египет со Јаков; секој со своето семејство дојде.

²Рувим, Симон, Левиј и Јуда,

³Исахар, Завулон и Венијамин,

⁴Дан и Нефталим, Гад и Асир.

⁵И сите, кои произлегоа од Јаков, беа седумдесет (и пет) души, а Јосиф, пак, беше во Египет.

⁶Потоа умре Јосиф и сите браќа негови, и сиот нивни род;

⁷а синовите израилски се народија и се намножија, станаа многу, и се засилија многу, така што земјата се наполни со нив.

⁸Тогаш во Египет се зацари нов цар, кој не знаеше за Јосиф,

⁹и му рече на својот народ: „Еве, народот на синовите израилски е многуброен и посилен од нас.

¹⁰Па ајде да ги надмудриме за да не се размножуваат; и, ако настане војна, да не се здружат со непријателите наши и да удрат на нас, па да си отидат од нашата земја.“

¹¹И поставија над нив надзорници над работите за да ги мачат со тешка работа. И тие му ги изградија на фараонот Питом, Рамзес (и Он, сега наречен Илиопол), градови — складишта.

¹²Но, колку повеќе ги мачеа, толку повеќе се множеа и се засилуваа така што Египќаните започнаа да се плашат од синовите на Израил.

¹³Затоа Египќаните ги угнетуваа синовите на Израил со жестокост,

¹⁴и им го загорчуваа животот со тешки работи со кал и со правење тули, и со разни полски работи, и со секаква друга работа, ги измачуваа немилосрдно.

¹⁵Освен тоа, царот египетски им заповеда на еврејските бабици, од кои на едната ѝ беше името Шифра, а на другата Пуа;

¹⁶и им рече: „Кога ќе бабувате кај Еврејките, и при породувањето, ако видите дека е машко, убијте го, а ако биде женско, нека живее!“

¹⁷Но бабиците се плашеа од Бога и не правеа така, како што им заповеда египетскиот цар, туку ги оставаа машките деца живи.

¹⁸А египетскиот цар ги повика бабиците и им рече: „Зошто правите така и ги оставате машките деца во живот?“

¹⁹А бабиците му одговорија на фараонот: „Еврејките не се како египетските жени: зашто тие се јаки и пред да дојде бабицата, веќе родиле.“

²⁰Бог беше добар кон бабиците и народот се множеше и многу се засилуваше.

²¹И бидејќи бабиците се плашеа од Бога, Бог ги умножи нивните семејства.

²²Тогаш фараонот му заповеда на целиот свој народ, велејќи: „Секое машко кое ќе се роди кај Евреите, фрлајте го в река: само женските деца оставајте ги во живот.“