Read Свето Писмо: Стандардна Библија 2006 (со девтероканонски книги) Исход 17 Bible Online

Исход 17 - Свето Писмо: Стандардна Библија 2006 (со девтероканонски книги) bible

Исход 17

¹И се крена целото општество на синовите израилски, од пустината Син, продолжувајќи го својот пат по заповед на Господ, и се задржаа во Рефидим; а таму немаше вода да пие народот.

²И народот го укори Мојсеј, велејќи: „Дај ни вода да пиеме!“ А Мојсеј им рече: „Зошто ме укорувате мене? Зошто Го искушувате Господа?“

³И жеден беше за вода народот таму, па негодуваше против Мојсеј и велеше: „Зошто нѐ изведе од Египет и нас, и синовите наши, и добитокот наш, за да нѐ помориш со жед?“

⁴А Мојсеј викна кон Господ и рече: „Што да правам со овој народ? Уште малку, па ќе ме каменуваат?“

⁵Но Господ му рече на Мојсеј: „Излези пред народот, и поведи со себе некои од старешините народни, земи го во раката и стапот свој, со кој го раздвои морето, па појди.

⁶А Јас ќе стојам онаму кај карпата на Хорев пред доаѓањето твое; а ти тогаш удри во карпата, и од неа ќе потече вода и народот ќе пие.“ И направи Мојсеј така пред синовите на Израил.

⁷И тоа место го нарече Маса и Мерива [4], поради кавгата помеѓу синовите израилски што Го искушуваа Господа, велејќи: „Дали е Господ меѓу нас, или не е?“

⁸Но тогаш дојдоа Амаликијците во војна против Израилците во Рефидим.

⁹А Мојсеј, пак, му рече на Исус: „Избери си (силни) мажи, па излези и бори се утре против Амаликијците; а јас ќе застанам на врвот од гората и стапот Божји ќе ми биде в рака.“

¹⁰И направи Исус, како што му рече Мојсеј, и излезе против Амаликијците; а Мојсеј, Арон и Ор се искачија на врвот од планината.

¹¹И кога Мојсеј ги креваше рацете свои — надвладуваа Израилците, а кога ги спушташе рацете — надвладуваа Амаликијците.

¹²Но рацете на Мојсеј му отежнаа; затоа зедоа камен и го ставија под него, па седна на него: а Арон и Ор му ги потпираа рацете: еден од една страна, а другиот — од другата. Така стоеја рацете Мојсееви кренати до зајдисонце.

¹³И го победи Исус Амалик и неговиот народ со сечилото на мечот.

¹⁴Потоа Господ му рече на Мојсеј: „Запиши го тоа за спомен во книгата, и објасни му на Исус да помни дека сосема ќе го избришам споменот за Амаликијците од под небото.“

¹⁵Тогаш Мојсеј подигна жртвеник (на Господ), и го нарече „Јахве Ниси“ — Господ ми е знаме!

¹⁶„Бидејќи, рече тој, рака се кренала на престолот Господов; Господ ќе војува против Амалик од поколение на поколение.“