Read Свето Писмо: Стандардна Библија 2006 (со девтероканонски книги) Исход 19 Bible Online

Исход 19 - Свето Писмо: Стандардна Библија 2006 (со девтероканонски книги) bible

Исход 19

¹Во првиот ден од третиот месец, откако излегоа синовите израилски од египетската земја, во ден на млада месечина, стигнаа во Синајската Пустина.

²Поаѓајќи од Рефидим, дојдоа во Синајската Пустина, и се улогори Израил таму спроти гората.

³И Мојсеј се искачи кај Бога, и му се јави Господ, велејќи: „Кажи му на домот Јаковов, и извести ги синовите на Израил:

⁴‚Сами видовте што им направив на Египќаните и како ве изнесов на крилја орлови, ве прибрав кај Себе.

⁵Па сега, ако го слушате гласот Мој и го пазите заветот Мој, ќе Ми бидете избран народ меѓу сите народи, зашто Моја е целата земја.

⁶И вие ќе Ми бидете царство на свештеници и свет народ.‘ Тоа се зборовите, што ќе им ги кажеш на синовите израилски.“

⁷Потоа Мојсеј дојде и ги повика народните старешини; и им ги изложи сите овие зборови, што му ги заповеда Господ.

⁸И сиот народ одговори еднодушно и рече: „Сѐ што рекол Господ ќе направиме.“ Тогаш Мојсеј Му ги соопшти на Господ зборовите на народот.

⁹А Господ му рече на Мојсеј: „Еве, Јас ќе дојдам кај тебе во густ облак, за да чуе народот, како ќе зборувам со тебе, па да ти поверува засекогаш.“ Зашто Мојсеј Му ги беше соопштил на Господ зборовите народни.

¹⁰И му рече Господ на Мојсеј: „Појди кај народот (извести го) и освети го денес и утре; и нека ги исперат облеките свои;

¹¹и нека се приготват за третиот ден, зашто во третиот ден ќе слезе Господ на Синајската Гора пред сиот народ,

¹²а ќе поставиш граници за сиот народ од сите страни и ќе им кажеш: ‚Пазете да не се качувате на планината и да не се допирате до подножјето нејзино; секој, кој ќе се допре до планината, ќе загине.

¹³Никаква рака да не се допре до него, туку со камења да биде убиен или со стрела да биде застрелан; добиток ќе е или човек, жив да не остане. А кога трубата ќе затруби отегнато (кога облакот ќе се крене од планината), тогаш ќе можат да се качат на планината.‘“

¹⁴И Мојсеј слезе од планината кај народот и го освети народот; и тие ги испраа облеките свои.

¹⁵И му рече на народот: „Бидете готови за третиот ден; и не приближувајте се до жена!“

¹⁶А третиот ден, на осамнување, загрме и молњи засветкаа, и настана густ облак над планината, и затруби труба со многу силен глас, така што затрепери сиот народ, кој беше во логорот.

¹⁷Тогаш Мојсеј го изведе народот од логорот, за да Го пресретне Бога; и застанаа во подножјето на планината.

¹⁸А Синајската Планина целата беше во дим, зашто Господ беше слегол на неа во оган; и дим се креваше од неа, како дим од печка; и целата планина силно се тресеше;

¹⁹и гласот на трубата стануваше сѐ посилен. Мојсеј зборуваше, а Господ му одговараше гласно.

²⁰И Господ слезе на планината Синај, на врвот од планината, и го повика Господ Мојсеј на врвот од планината. Мојсеј се искачи.

²¹Тогаш Бог му рече на Мојсеј: „Слези и кажи му на народот да не навалува за да Го види Господа, та да не изгинат мнозина од нив;

²²а свештениците, кои пристапуваат кон Господ, нека се осветат, за да не ги погуби Господ.“

²³Тогаш Мојсеј Му рече на Господ: „Не ќе може народот да се качи на Синајската Планина, бидејќи Ти изрично нѐ опомена, велејќи — омеѓи ја гората и освети ја.“

²⁴Но Господ му рече: „Оди, слези, па тогаш качете се ти и Арон со тебе; а свештениците, пак, и народот нека не навалуваат да се качат при Господ, за да не загинат.“

²⁵И слезе Мојсеј кај народот и му објасни.