Read Свето Писмо: Стандардна Библија 2006 (со девтероканонски книги) Исход 26 Bible Online

Исход 26 - Свето Писмо: Стандардна Библија 2006 (со девтероканонски книги) bible

Исход 26

¹„Направи и скинија од десет платништа: од пресукан лен, од сина, црвена и светлоцрвена волна; врз нив да направиш и херувими — уметничка изработка.

²Должината на секое платниште нека е дваесет и осум лакти, додека ширината на секое платниште — четири лакти; таа мерка да биде за сите платништа.

³Петте платништа нека се поврзани едно со друго, а и петте други платништа нека се поврзани едно со друго.

⁴И направи сини котелци по работ на првото платниште, од едната страна за соединување; така направи и по работ на последното платниште: каде што ќе се соединуваат двете половини;

⁵педесет котелци направи на едно платниште, и педесет котелци направи по работ на другото платниште, каде што ќе се соединуваат со следното; да бидат еден спроти друг.

⁶Направи и педесет кукички од злато и со кукичките соедини го едното платниште со другото; и така скинијата ќе претставува една целина.

⁷Потоа направи платништа од козина за покривање на скинијата; единаесет такви платништа направи.

⁸Едното платниште да е долго триесет лакти, а широко — четири лакти; таа мерка да биде за сите единаесет платништа.

⁹И соедини ги петте платништа одделно, и шестте платништа одделно; шестото платниште откај влезот во скинијата свиткај го на две.

¹⁰Направи и педесет котелци по работ од едното крајно платниште, и педесет котелци по работ од второто крајно платниште, каде што ќе се соединуваат.

¹¹И направи педесет кукички од бакар и состави ги кукичките со котелците, па соедини ги платништата, за да бидат една целина.

¹²А остатокот од платништата на скинијата превиткај го, нека биде таа половина спуштена над скинијата од задната страна;

¹³остатокот, пак, од должината на платништата на скинијата — лакот од едната страна и лакот од другата страна — нека бидат спуштени од страните на скинијата — од едната и од другата страна, за да ја покриваат.

¹⁴И направи покрив над скинијата од овнешки кожи, црвено обоени, како и покрив од сини кожи — одозгора.

¹⁵Направи и штици за скинијата од дрвото шитим што ќе стојат исправени;

¹⁶десет лакти нека биде долга една штица, а лакот и пол широка секоја штица;

¹⁷на секоја штица нека има по два клина — еден спроти друг; така направи на секоја штица за скинијата.

¹⁸Така направи штици за скинијата: дваесет штици од страната откај Негев што е на југ,

¹⁹а под дваесетте штици направи четириесет подножја од сребро: две подножја на една штица за обата клина нејзини, и две подножја под другата штица за обата клина нејзини;

²⁰и дваесет штици за другата страна на скинијата, од север,

²¹со четириесет подножја сребрени: две подножја под едната штица и две подножја под другата штица.

²²А од задната страна на скинијата — што е откај запад, направи шест штици.

²³И направи две штици за аглите на скинијата од задната страна;

²⁴тие да бидат одоздола и одозгора поврзани со алка; така нека биде со двете; тие нека бидат за обата агла;

²⁵и така ќе има осум штици со шеснаесет подножја сребрени: по две подножја под една штица, и по две подножја под друга штица — за обата клина нејзини.

²⁶Понатаму направи напречници од дрвото шитим, пет за штиците од едната страна на скинијата,

²⁷и пет напречници за штиците од другата страна на скинијата, и пет напречници за штиците од задната страна на скинијата, што е кон запад;

²⁸а внатрешниот напречник да минува преку средината на штиците, од едниот крај до другиот.

²⁹Штиците опкови ги со злато, а и алките за напречниците направи ги од злато; напречниците исто така, опкови ги со злато.

³⁰Така ќе ја направиш скинијата според образецот, што ти беше покажан на планината.

³¹И направи завеса од сина, пурпурна и црвена волна и пресукан лен; и на неа нека има уметнички извезени херувими.

³²И закачи ја на четири столба од шитим, опковани со злато, со златни кукички, а нивните подножја — сребрени.

³³Потоа обеси ја завесата на кукичките, и внеси го таму зад завесата ковчегот на заветот; и завесата ќе го одделува светилиштето од Светињата над светињите.

³⁴И со капакот — чистилиште покриј го ковчегот на заветот во Светињата над светињите.

³⁵Намести и трпеза пред завесата и светилник спрема трпезата, од јужната страна на скинијата, а трпезата постави ја на северната страна.

³⁶И направи завеса за влезот во скинијата од сина, пурпурна и црвена волна и од пресукан лен — везена работа.

³⁷За таа завеса ќе направиш пет столбови од шитим, опковани со злато и со златни кукички; па ќе им излиеш за нив и пет подножја од бронза.“