Read Свето Писмо: Стандардна Библија 2006 (со девтероканонски книги) Исход 27 Bible Online

Исход 27 - Свето Писмо: Стандардна Библија 2006 (со девтероканонски книги) bible

Исход 27

¹„Направи и жртвеник од дрвото шитим — пет лакти долг и пет лакти широк; четириаголен да биде жртвеникот и три лакти висок.

²А на неговите четири агли направи им рогови, така што роговите да излегуваат од него; и опкови го со бронза.

³Потоа направи за него котли за исипување во нив на пепелот, и лопатчиња, и потири, и вилушки, и кадилници; сиот овој прибор направи го од бакар.

⁴И направи му решетка од бакар во вид на мрежа, а на решетката од четирите нејзини агли, направи и четири алки од бакар;

⁵и стави ги под рамката на жртвеникот, долу, така што решетката да зафаќа до средината на жртвеникот.

⁶Направи за жртвеникот лостови, лостови од дрвото шитим, и опкови ги со бакар;

⁷лостовите да се провлечат низ алките, така што лостовите да излегуваат од двете страни на жртвеникот, за да се носи.

⁸Ќе го направиш од штици, однатре да биде празен; како што ти беше покажано на гората, така да се направи.

⁹Направи и двор на скинијата. На јужната страна, откај Негев, завесите за дворот треба да бидат од пресукан лен, сто лакти во должина од едната страна;

¹⁰столбови за нив да има дваесет, а подножја од бакар — дваесет; кукичките за нивните столбови и обрачите нивни да бидат сребрени.

¹¹Исто така и од северната страна завесите да бидат сто лакти долги; и дваесет столбови за нив со дваесет подножја од бакар; кукичките нивни и обрачите на столбовите да бидат од сребро.

¹²А и по ширина на дворот, откај западната страна, да има завеси, долги педесет лакти; со десет столбови и десет подножја за нив.

¹³А и од предната страна, кон исток, дворот треба да има педесет лакти ширина (со столбови од десет лакти и десет подножја).

¹⁴Од петнаесет лакти нека бидат завесите од едната страна, и за нив три столба и три подножја под нив;

¹⁵и од другата страна завеси, од петнаесет лакти, со три столба за нив и три подножја под нив.

¹⁶А за вратата на дворот завесата да е дваесет лакти, од сина, пурпурна и црвена волна и со пресукан лен — уметничка работа; и четири столба за неа, со четири подножја под нив.

¹⁷Сите столбови околу дворот треба да бидат поврзани со обрачи од сребро; и кукичките нивни да им се сребрени, а подножјата од бакар.

¹⁸Во должина дворот да има сто лакти, во ширина по педесет насекаде, додека во висина пет лакти — од пресукан лен, а подножјето од бакар.

¹⁹Сиот прибор во скинијата за општа употреба и сите нејзини колови, и сите колови на дворот да се од бакар.

²⁰И заповедај им на синовите израилски да ти носат чисто масло, исцедено од маслинка, за светење, за да гори светилникот секогаш.

²¹Во скинијата на собранието пред завесата, која ќе го закрива ковчегот на заветот, Арон и неговите синови нека го палат, да гори пред Господ од вечер до утрина. Тоа нека е вечен закон за поколенијата на синовите израилски.“