Read Свето Писмо: Стандардна Библија 2006 (со девтероканонски книги) Исход 29 Bible Online

Исход 29 - Свето Писмо: Стандардна Библија 2006 (со девтероканонски книги) bible

Исход 29

¹„А еве што да направиш над нив, за да ги посветиш за Мои свештеници: земи теле од говедата и два овна здрави,

²и бесквасни лебови, бесквасни погачки замесени со масло, и питки бесквасни намачкани со масло; од пченично бело брашно направи ги.

³Стави ги во една кошница, и принеси ги со кошницата, заедно со телето и двата овна.

⁴Доведи го Арон и синовите негови пред влезот на скинијата, и измиј ги со вода.

⁵А откако ќе ги земеш одеждите, облечи го Арон, во хитон и во наметка, во ефод и во наградник и опаши го преку ефодот;

⁶стави му го на глава кидарот, а на кидарот прицврсти го венецот на светоста.

⁷И земи масло за помазание, излеј на главата негова и помажи го.

⁸Потоа доведи ги синовите негови и облечи ги во хитоните.

⁹И опаши ги со појаси, Арон и неговите синови, и стави им ги превивките на главата, па свештенството нека им припаѓа вечно. Така ќе ги посветиш рацете на Арон и на неговите синови.

¹⁰Потоа доведи го телето пред вратата на скинијата, и Арон и синовите негови нека ги положат рацете свои врз главата на телето.

¹¹И заколи го телето пред Господ, пред влезот во скинијата,

¹²и земи крв од телето и со твојот прст помажи ги роговите на жртвеникот, а остатокот од крвта, сета излиј ја во подножјето на жртвеникот.

¹³Потоа земи го сиот лој што ја обвива внатрешноста, кошулката на црниот дроб и обата бубрега со лојот околу нив, и запали ги на жртвеникот.

¹⁴А месото од телето, кожата негова и нечистотиите изгори ги на оган надвор од логорот. Тоа е жртва за грев.

¹⁵Потоа земи го едниот овен, и Арон и синовите негови нека ги положат рацете свои врз главата на овенот;

¹⁶па заколи го овенот, земи крв од него и со неа полиј го жртвеникот од сите страни;

¹⁷овенот, пак, исечи го на делови, измиј ја внатрешноста и нозете негови, и стави ги врз расечените делови со главата,

¹⁸и изгори го целиот овен на жртвеникот. Тоа е жртва сепаленица пред Господ, мирис благопријатен, жртва на Господ.

¹⁹Земи го потоа и другиот овен, та Арон и синовите негови нека ги положат рацете свои на главата на овенот;

²⁰заколи го овенот и земи од неговата крв, па помажи го со неа крајчето од десното уво на Арон, и крајчето од десното уво на неговите синови, а и палецот на десната рака нивна, и палецот од десната нога нивна; а со крвта, што ќе преостане, попрскај го жртвеникот од сите страни.

²¹Потоа земи од крвта, што е на жртвеникот и масло за помазание, и попрскај го Арон и одеждите негови, и синовите негови и одеждите нивни — па ќе бидат осветени тој и одеждите негови, и синовите негови и одеждите на синовите негови со него.

²²Освен тоа, земи лој од овенот и опашката негова, и лојот што ја обвива внатрешноста негова, како и кошулката од црниот дроб и обата бубрега и лојот што е на нив, и десната плешка (тоа е овен за посветување);

²³и еден леб и една погачка со масло, и една питка од кошницата со бесквасни лебови, приложена пред Господ.

²⁴Сето тоа стави го врз рацете на Арон и врз рацете на синовите негови, и принеси го тоа со нишање пред Господ.

²⁵Потоа земи им го тоа од рацете нивни, и изгори го на жртвеникот, со жртвата сепаленица, за да биде мирисот благопријатен пред Господ: тоа е принос пред Господ.

²⁶И земи ги градите од овенот за Ароновото посветување и принеси ги со нишање пред Господ — и тоа ќе биде твој дел.

²⁷И освети ги градите од приносот, што беа нишани, и плешката на вознесението што беше вознесена, од овенот за посветување на Арон и на синовите негови;

²⁸и тоа нека биде за Арон и за синовите негови вечен дел од синовите на Израил, бидејќи тоа е вознесение; тоа вознесение треба да го прават (синовите на Израил) при благодарствените жртви; нивното вознесение е дар за Господ.

²⁹А светите одежди Аронови по него нека преминат на синовите негови, за да бидат во нив помазувани и во нив да се посветуваат за свештеници.

³⁰Седум дена нека се облекува во нив свештеник од синовите негови, оној, кој на неговото место ќе биде свештеник, кој ќе влегува во скинијата за да служи во светилиштето.

³¹А овенот за посветување земи го и месото негово свари го на свето место;

³²и Арон и синовите негови нека го изедат месото од тој овен со лебовите од кошницата при влезот во скинијата.

³³Зашто преку тоа е извршено очистување и послужило за нивното посветување во свештенство; човек друг да не јаде, зашто тоа е света работа;

³⁴а и ако остане нешто од месото на жртвата за посветување, или од лебовите до изутрина, остатокот изгори го на оган; тоа не треба да се јаде, зашто е светиња.

³⁵И направи така со Арон и со синовите негови сѐ онака како што ти заповедав. Седум дена посветувај ги рацете нивни.

³⁶Теле заради гревовите да принесуваш секој ден за очистување; и жртва за грев да принесуваш врз жртвеникот за да го очистиш; и помажи го за да биде осветен.

³⁷Седум дена ќе го очистуваш жртвеникот и ќе го осветуваш, и жртвеникот ќе биде голема светиња; секој кој ќе се допре до жртвеникот, ќе се освети.

³⁸А еве што ќе принесуваш на жртвеникот: две јагниња (без недостаток) стари една година, секој ден без прекин.

³⁹Едното јагне принесувај го наутро, а другото принесувај го навечер;

⁴⁰и уште по една десетина ефа пченично брашно измешано со четврт ин исцедено масло, а за преливање — четврт ин вино, за едно јагне;

⁴¹а другото јагне принесувај го навечер: со принос од брашно како утринскиот и со исто такво преливање принесувај го, како благопријатен мирис, жртва на Господ.

⁴²Тоа нека биде постојана жртва сепаленица во поколенијата ваши пред вратата од скинијата, пред Господ, каде што ќе ти се јавувам, за да зборувам со тебе.

⁴³И таму ќе им се јавувам на синовите израилски, и ќе се освети тоа место со славата Моја.

⁴⁴А ќе ги осветам скинијата и жртвеникот; и Арон и синовите негови ќе ги осветам, за да Ми свештенодејствуваат.

⁴⁵Ќе пребивам меѓу синовите израилски и ќе им бидам Бог,

⁴⁶и ќе познаат дека Јас сум Господ, Бог нивни, Кој ги изведе од земјата египетска за да пребива меѓу нив. Јас сум Господ, нивниот Бог.“