Read Свето Писмо: Стандардна Библија 2006 (со девтероканонски книги) Исход 30 Bible Online

Исход 30 - Свето Писмо: Стандардна Библија 2006 (со девтероканонски книги) bible

Исход 30

¹„Направи и жртвеник за кадење, од дрвото шитим направи го:

²должината нека му биде лакот, а ширината лакот, четвороаголен да биде, и два лакта висок; од него нека излегуваат роговите негови;

³позлати го со чисто злато одозгора, од страните наоколу, и роговите негови; направи му златен венец наоколу;

⁴под венецот на двата агли негови направи и две алки од (чисто) злато; од двете страни направи ги; низ нив проври лостови, за да може да се носи жртвеникот;

⁵лостовите направи ги од дрвото шитим, и опкови ги со злато.

⁶Па стави го пред завесата, која виси пред ковчегот на заветот, спрема капакот што е врз ковчегот на заветот, од каде што ќе ти се јавувам тебе.

⁷А Арон нека кади на него со кадиво со пријатна миризба; нека кади над него, секое утро, кога ги приготвува кандилата.

⁸И кога ќе ги пали Арон кандилата навечер, нека кади над него; нека има постојано кадење пред Господ во поколенијата ваши.

⁹Не принесувај над него никакво друго кадиво, ни сепаленици, ниту принос од леб, ни преливање не изливајте над него.

¹⁰Арон еднаш во годината нека врши очистување над роговите негови; со крв од жртва за очистување на гревовите нека се врши очистување еднаш годишно во поколенијата ваши, зашто тоа е голема светиња пред Господ.“

¹¹И уште му рече Господ на Мојсеј, велејќи:

¹²„Кога ќе ги пребројуваш синовите на Израил, при вршење преглед, секој нека даде на Господ откуп за душата своја, при нивното пребројување, и нема да има меѓу нив погубно уништување за време на пребројувањето;

¹³оние што ќе доаѓаат за пребројување нека даваат по половина шекел, свештен шекел: во тој шекел има дваесет гери; а половината шекел е принос на Господ.

¹⁴Сите што доаѓаат на пребројување, а имаат по дваесет години и нагоре, треба да даваат принос на Господ.

¹⁵Богатиот да не дава повеќе, а сиромавиот да не дава помалку од половина шекел, кога давате принос на Господ за откуп на душите ваши.

¹⁶А, откако ќе го собереш откупеното сребро од синовите на Израил, употребувај го за служење во скинијата. Тоа ќе им биде на синовите на Израил спомен пред Господ, за откуп на душите ваши!“

¹⁷И уште му рече Господ на Мојсеј, велејќи:

¹⁸„Направи и мијалник од бакар за миење и подножјето негово нека е од бакар; постави го меѓу скинијата и жртвеникот и налеј вода во него;

¹⁹и Арон и синовите негови од него нека ги мијат рацете свои и нозете свои;

²⁰кога влегуваат во скинијата, нека се мијат со вода, за да не умрат; или кога пристапуваат кон жртвеникот, да Му служат и да Му принесуваат на Господ жртва;

²¹тогаш нека ги мијат рацете свои и нозете свои, за да не умрат. Тоа нека им биде наредба вечна, нему и на потомството негово по него.“

²²Му рече Господ уште на Мојсеј, велејќи:

²³„Земи мириси најубави: смирна чиста — петстотини шекели, миризлив цимет половина од тоа — двесте и педесет, и трстика миризлива — исто така двесте и педесет,

²⁴касија — петстотини шекели, според свештениот шекел, и маслиново масло еден ин;

²⁵и од тоа направи масло — миро за свето помазание; мирото за свето помазание да биде направено со умешноста на мироварец; тоа нека биде миро за свето помазание.

²⁶Со него помажи ја скинијата на собранието и ковчегот на заветот

²⁷и трпезата и сиот нејзин прибор, и светилникот и сите делови негови, и жртвеникот за кадење;

²⁸и жртвеникот, на кој се принесува жртва сепаленица, и сиот негов прибор, и мијалникот и подножјето негово.

²⁹Така ќе ги осветиш, па ќе станат голема светиња и сѐ што ќе се допре до нив, ќе се освети.

³⁰Помажи го и Арон и синовите негови, и посвети ги, за да Ми бидат свештеници.

³¹А на синовите израилски кажи им: ова масло за помазание нека Ми биде миро за свето помазание за сите поколенија ваши.

³²Телото на обичен човек нека не се помажува со него, и не правете за себе такво миро какво што е ова. Тоа е светиња и нека остане светиња за вас.

³³Ако некој направи такво миро, или помаже друг со него, нека биде истребен од народот свој.“

³⁴И му рече Господ на Мојсеј: „Земи благопријатни мириси: стакта, оникс, халван миризлив, и чист темјан, од сите работи во еднакви делови,

³⁵и од нив направи кадиво, миро варено, со умешноста на мироварец, чисто и свето.

³⁶Па, откако ќе го истолчиш ситно, ставај од него во скинијата пред ковчегот на заветот, каде што ќе ти се јавувам; тоа нека ви биде голема светост.

³⁷А такво кадиво, какво што ќе го направиш, немојте да правите за себе; тоа нека ви биде светост пред Господ.

³⁸А, ако некој го направи тоа, за да кади со него, нека биде истребен од народот свој.“