Read Свето Писмо: Стандардна Библија 2006 (со девтероканонски книги) Исход 8 Bible Online

Исход 8 - Свето Писмо: Стандардна Библија 2006 (со девтероканонски книги) bible

Исход 8

¹Потоа Господ пак му рече на Мојсеј: „Оди кај фараонот, и речи му — вака вели Господ: ‚Пушти го народот Мој, да Ми изврши служба.‘

²А ако не се согласиш да го пуштиш, еве, Јас ќе ја казнам целата земја твоја со жаби;

³и реката ќе се исполни со многу жаби, и тие ќе излезат и ќе влезат кај тебе дома, и во твојата спална, и во постелата твоја, и во куќите на слугите твои и народот твој, и во печките твои, и во ноќвите твои.

⁴Врз тебе ќе скокаат жаби и врз народот твој и врз слугите твои.“

⁵И му рече Господ на Мојсеј: „Кажи му на Арон: Пружи ја раката твоја со стапот свој врз реките, врз потоците и врз езерата, и направи жаби да излезат по земјата египетска.“

⁶И ја пружи Арон раката своја врз водите египетски, и произлегоа жаби; и ја покрија земјата египетска.

⁷Но и врачевите го направија истото со своето вражање, па изведоа жаби по земјата египетска.

⁸Тогаш фараонот ги повика Мојсеј и Арон и им рече: „Помолете Му се на Господ, да ги отстрани жабите од мене и од народот мој, и јас ќе го пуштам народот да Му принесе жртва на Господ.“

⁹А Мојсеј му рече на фараонот: „Определи кога сакаш да Му се помолам за тебе, за слугите твои и за твојот народ, за да се отстранат жабите од тебе и од куќите ваши, а само во реката да останат.“

¹⁰И рече: „Утре.“ А Мојсеј рече: „Нека биде како што рече ти, за да познаеш дека нема друг како Господ, нашиот Бог.

¹¹Ќе отидат жабите од тебе, од куќите твои (и од нивните), од слугите твои и од народот твој; само во реката ќе останат.“

¹²Потоа Мојсеј и Арон излегоа откај фараонот. И Мојсеј Му се помоли на Господ за жабите, што Тој ги беше испратил врз фараонот.

¹³И Господ направи како што измоли Мојсеј: жабите изгинаа по куќите, по дворовите и по нивите.

¹⁴И ги собраа на купишта, така што земјата засмрде.

¹⁵А кога фараонот виде дека злото помина, му отврдна срцето, и не ги послуша нив, како што беше рекол Господ.

¹⁶Тогаш Господ му рече на Мојсеј: „Кажи му на Арон: ‚Пружи го стапот свој, и удри по земјата‘ — и ќе се појават мушички по целата земја египетска.“

¹⁷Така и направија: Арон го пружи со раката стапот свој, и удри по правот на земјата, и се појавија мушички по луѓето и по добитокот; сиот песок на земјата се претвори во мушички, по целата земја египетска.

¹⁸Се обидоа и вражачите со вражањето свое да произведат мушички, но не можеа. И имаше мушички по луѓето и по добитокот.

¹⁹И му рекоа вражачите на фараонот: „Ова е знак Божји!“ Но срцето на фараонот пак се стврдна, и не ги послуша, како што беше рекол Господ.

²⁰И Господ му рече на Мојсеј: „Стани утре рано и појди кај фараонот. Тогаш тој ќе излезе кај реката, а ти кажи му: ‚Вака вели Господ: пушти го народот Мој, да Ми изврши служба (во пустината).‘

²¹А ако не сакаш да го пуштиш народот Мој, еве, Јас ќе пуштам врз тебе и врз слугите твои, и врз народот твој и во домовите твои бубачки, и ќе се исполнат со бубачки куќите египетски, и земјата на која стојат.

²²А во оној ден ќе ја одделам земјата Гошен, каде што живее Мојот народ, и таму нема да има бубачки, за да познаеш дека Јас сум Господ (Бог) на (целата) земја.

²³И ќе направам разлика меѓу народот Мој и народот твој. Утре ќе го има тој знак (на земјата).“

²⁴И направи Господ така: и се појавија многу бубачки во куќата фараонова, во куќите на слугите негови и во целата земја египетска; земјата настрада од бубачките.

²⁵Фараонот ги повика Мојсеј и Арон, и им рече: „Отидете, принесете Му жртва на Господ, вашиот Бог во оваа земја!“

²⁶Но Мојсеј рече: „Не е можно така да биде, зашто принесувањето жртва на Господ, нашиот Бог, е нечисто за Египќаните; ако ние принесеме нечиста за Египќаните жртва пред нивните очи, нема ли тие да нѐ убијат со камења?

²⁷Три дена пат ќе одиме во пустината, за да Му принесеме жртва на Господ, нашиот Бог, како што Тој ќе нѝ каже.“

²⁸И фараонот рече: „Ќе ве пуштам да Му принесете жртва на Господ, вашиот Бог, во пустината; но не одете подалеку, и помолете се и за мене!“

²⁹А Мојсеј рече: „Еве, јас одам од тебе и ќе Му се помолам на Господ, и бубачките утре ќе исчезнат од тебе и од слугите твои, а и од народот твој. Но престани, фараоне, да нѐ мамиш, не пуштајќи го народот да Му принесе жртва на Господ!“

³⁰И отиде Мојсеј од фараонот, и Му се помоли на Господ.

³¹И Господ направи како што измоли Мојсеј, и си отидоа бубачките од фараонот, и од слугите негови, и од народот негов; не остана ниедна.

³²Но пак се ожесточи срцето фараоново, и пак не го пушти народот.