Read Свето Писмо: Стандардна Библија 2006 (со девтероканонски книги) Јов 13 Bible Online

Јов 13 - Свето Писмо: Стандардна Библија 2006 (со девтероканонски книги) bible

Јов 13

¹„Ете, сето тоа окото мое го виде, увото мое го чу и го разбра.

²Колку што знаете вие, знам и јас; не сум подолу од вас.

³Но јас кон Седржителот би сакал да говорам, би сакал со Бога да се соочам.

⁴Зашто вие сте ковачи на лаги; сите вие сте бесполезни лечители.

⁵Кога би знаеле да молчите, би било тоа ваша најголема мудрост.

⁶Ислушајте го мојот приговор и проникнете во жалбите на усните мои.

⁷Требаше ли да говорите заради Бога неправда и заради Него да говорите лага?

⁸Требаше ли да бидете пристрасни кон Него и за Бога така да се препирате?

⁹Добро ли ќе биде, Тој да ве испитува? Ќе Го измамите ли како што се измамува човек?

¹⁰Тој строго ќе ве казни, иако скришно лицемерите.

¹¹Зар големината Негова не ве плаши, и страв од Него не ве обзема?

¹²Вашите забелешки прилегаат на пепел; вашата одбрана е глинена ограда.

¹³Молкнете пред мене, а јас ќе говорам, што и да ме снајде.

¹⁴Зар јас самиот да си го раскинувам со забите телото свое? И душата своја да си ја ставам в рака?

¹⁵Тој нека ме убие, немам што повеќе да загубам; само сакам однесувањето мое пред лицето Негово да го оправдам.

¹⁶И тоа ми е веќе за спасение, бидејќи безбожник нема да се јави пред лицето Негово.

¹⁷Ислушајте ги внимателно зборовите мои и објасненијата мои со ушите ваши.

¹⁸Ете, започнав судска постапка; знам дека ќе бидам прав.

¹⁹Кој има сила да ме надвие? Потоа ќе молкнам и ќе го испуштам духот.

²⁰Само две работи направи за мене, и тогаш јас нема да се кријам од Твоето лице;

²¹тргни ја од мене раката Своја, и Твојот ужас да не ме потресува.

²²Тогаш прашувај ме, и јас ќе одговарам; или јас да прашувам, а Ти да одговараш.

²³Колку се пороците и гревовите мои? Покажи ми го беззаконието мое и гревот мој.

²⁴Зошто го криеш сега лицето Свое од мене и ме сметаш за Твој непријател?

²⁵Зошто со страв го мачиш од ветрот скинатиот лист, зошто ја гониш сувата сламка?

²⁶Зошто пишуваш против мене горчливи пресуди и ми ги сметаш гревовите на младоста моја,

²⁷ги тураш во клада нозете мои и ги демнеш сите мои патишта, — ги испитуваш трагите на нозете мои?

²⁸А животот мој како изгниено дрво се распаѓа, како облека од молци изедена.“