Read Свето Писмо: Стандардна Библија 2006 (со девтероканонски книги) Јов 22 Bible Online

Јов 22 - Свето Писмо: Стандардна Библија 2006 (со девтероканонски книги) bible

Јов 22

¹Проговори тогаш Елифаз од Теман и рече:

²„Зар човек може да Му биде корисен на Бога? Мудриот сам за себе е полезен.

³Се радува ли Седржителот затоа што си праведен? И ќе има ли полза за Него, затоа што ги чуваш непорочни патиштата свои?

⁴Зар Тој, плашејќи се од тебе, ќе влезе во борба со тебе, ќе појде ли да се суди со тебе?

⁵Навистина, твојата злоба е голема, и беззаконијата твои крај немаат.

⁶Навистина, ти земаше залог од браќата свои за ништо и на полуголи им ги соблекуваше алиштата нивни.

⁷На измачен од жед не му даваше вода да се напие, а на гладен леб му откажуваше;

⁸а на силен човек му даваше земја, и повидниот се населуваше на неа.

⁹Вдовиците ги испраќаше без ништо, и сираците ги оставаше со празни раце.

¹⁰Затоа околу тебе има стапици, и неочекуваниот ужас те збунува.

¹¹Темнина е околу тебе, во која ништо не гледаш и голема вода те покрива.

¹²Нели Бог е повисоко од небесата? Погледај ги горе ѕвездите, колку се високо тие!

¹³И ти велиш: ‚што знае Бог?‘ Може ли Тој да суди во мрак?

¹⁴Облаците се Негова завеса, така што не гледа, туку само оди по небесниот круг.

¹⁵Зар ти не одиш по патот на старите, по кој оделе беззакониците,

¹⁶а кои предвреме беа истребени, кога водата се беше разлеала под основите нивни?

¹⁷Тие му велеа на Бога: ‚отстрани се од нас! И што ќе им направи Седржителот?‘

¹⁸Тој ги полнеше со богатство куќите нивни. — Но далеку да е од мене советот на безбожниците!

¹⁹Ќе видат праведници и ќе се радуваат, а непорочните ќе им се потсмеваат:

²⁰‚Непријателите наши пропаднаа, а имотот нивни оган го гори.‘

²¹Зближи се со Него — и ќе бидеш спокоен; преку тоа ќе ти дојде доброто.

²²Прими го од устата Негова законот и стави ги зборовите Негови во срцето свое.

²³Ако се обрнеш кон Седржителот, одново ќе се средиш; ќе го отстраниш беззаконието од шаторот свој;

²⁴тогаш ќе го фрлиш драгоцениот метал во прав, и во поточните камења — офирското злато.

²⁵Седржителот ќе биде твоето злато, ќе биде за тебе како блескаво сребро.

²⁶И тогаш ќе се радуваш на Седржителот, ќе го кренеш лицето свое кон Бога.

²⁷Ќе Му се помолиш, и Тој ќе те чуе, и ти ќе ги исполниш заветите свои.

²⁸Ќе наумиш нешто, и тоа ќе се исполни, над твоите патишта ќе свети светлина.

²⁹Кога некој ќе биде понизен, ќе речеш: ‚угоре!‘ и Тој ќе го спаси оној со наведнатото лице;

³⁰ќе го спаси и виновниот; а ќе го спаси преку чистотата на твоите раце.“