Read Свето Писмо: Стандардна Библија 2006 (со девтероканонски книги) Јов 29 Bible Online

Јов 29 - Свето Писмо: Стандардна Библија 2006 (со девтероканонски книги) bible

Јов 29

¹Го продолжи Јов својот возвишен збор и рече:

²„О, да бев како во поранешните месеци, како во оние денови, кога Бог ме чуваше,

³кога светилото Негово светеше над главата моја, и под Неговата светлина одев среде темнина;

⁴како што бев во деновите на своите млади години, кога милоста Божја беше над шаторот мој,

⁵кога Седржителот уште беше со мене, и децата мои околу мене,

⁶кога нозете мои се бањаа во млеко, кога од карпата за мене маслиново масло течеше,

⁷кога излегував пред градските порти и го поставував седиштето мое на плоштадот, —

⁸младите пат ми правеа, а старците стануваа и стоеја;

⁹кнезовите ги прекинуваа говорите свои и ставаа рака на устата своја;

¹⁰гласот на првенците замолкнуваше, јазикот им се залепуваше за непцата нивни.

¹¹Уво што ќе ме чуеше, велеше: блазе си ти; око што ќе ме видеше, ме восфалуваше,

¹²зашто јас го спасував страдалникот што викаше и беспомошниот сирак.

¹³Врз мене доаѓаше благословот на оној што пропаѓаше; на вдовичиното срце му донесував радост.

¹⁴Се облекував во правда, и судот ми беше како наметка и венец.

¹⁵Јас бев очи на слепиот и нозе на хромиот;

¹⁶за сиромасите бев татко и внимателно ја проучував поплаката, која не ја знаев.

¹⁷На беззаконикот му ги кршев забите, и од забите му го истргнував украденото.

¹⁸Па си велев: ‚Ќе свршам во гнездото свое, и дните мои ќе бидат многу — како песокот.‘

¹⁹Коренот мој беше покрај вода, росата ноќеваше на гранките мои;

²⁰славата моја се подмладуваше, и лакот мој стануваше појак во раката моја.

²¹Ме слушаа и чекаа; и не мрмореа на советот мој.

²²По моите зборови веќе не расудуваа; зборот мој ги натопуваше нив.

²³Ме очекуваа како дожд; ја отвораа устата како за задоцнет дожд.

²⁴Се случуваше, ќе им се насмевнев, — тие не веруваа; и светлината на лицето мое не ја замрачуваа.

²⁵Кога одев кај нив, седев на чело; и живеев како цар меѓу војници, како утешител на оние што плачат.“