Read Свето Писмо: Стандардна Библија 2006 (со девтероканонски книги) Псалми 131 Bible Online

Псалми 131 - Свето Писмо: Стандардна Библија 2006 (со девтероканонски книги) bible

Псалми 131

¹Сети се, Господи, на Давид и на сета негова ревност,

²како што се заколна пред Господ, и Му вети на Јакововиот Бог:

³„Нема да влезам под шаторот на домот свој, и нема да легнам на леглото мое;

⁴нема да им дадам сон на очите мои, ни дремка на веѓите мои, ниту одмор на слепоочниците мои,

⁵додека не најдам место за Господ, дом за Јакововиот Бог.“

⁶Ете, ние чувме дека е во Ефрата, го најдовме во Јаарските полиња;

⁷да влеземе во неговиот дом, да се поклониме пред местата каде што стојат нозете негови.

⁸Стани, Господи, дојди во местото каде што е Твојата почивка, Ти и светиот ковчег Твој.

⁹Твоите свештеници нека се облечат во праведност; Твоите светии нека се зарадуваат.

¹⁰Поради Давид, Твојот слуга, не одвраќај го лицето Свое од Твојот помазаник.

¹¹Му се заколна Господ на Давид со верност, и од неа нема да се откаже: „Од плодот на твојата утроба ќе поставам на престолот твој.

¹²Ако твоите синови го пазат Мојот завет и Моите сведоштва, на кои ќе ги научам, тогаш и синовите нивни ќе седат вечно на твојот престол.“

¹³Зашто Господ го избра Сион, Му омиле да живее во него.

¹⁴„Тоа е моето одмориште засекогаш: тука ќе се населам, бидејќи многу го засакав.

¹⁵Ќе го благословувам и преблагословувам трудот негов, сиромасите негови со леб ќе ги наситувам;

¹⁶свештениците негови ќе ги облечам во спасение, и светиите негови радосно ќе воскликнуваат.

¹⁷Таму ќе кренам рог за Давид, му подготвив светилник на Мојот помазаник.

¹⁸Непријателите негови ќе ги облечам во срам, а на него ќе блешти круна.“