Read Свето Писмо: Стандардна Библија 2006 (со девтероканонски книги) Псалми 143 Bible Online

Псалми 143 - Свето Писмо: Стандардна Библија 2006 (со девтероканонски книги) bible

Псалми 143

¹Нека е благословен Господ, Карпата моја, Кој ги учи рацете мои за борба и прстите мои за војна.

²Тој е милост моја и прибежиште мое, мој застапник и избавител мој — и јас на Него се надевам. Тој ми го потчинува мојот народ мене.

³Господи, што е човекот, па внимаваш на него, или син човечки — та да се сеќаваш на него?

⁴Човекот е како здив; дните негови одминуваат како сенка.

⁵Господи, приклони ги небесата Свои и слези; допри се до горите, и тие ќе се здимат;

⁶болсни со молњи и растерај ги, пушти ги стрелите Свои и распрсни ги;

⁷подај ја раката Твоја од височини, изведи ме и избави ме од многуте води, од рацете на туѓински синови,

⁸чии усти кажуваат лага и чија десница е десница на неправдата.

⁹Боже, нова песна ќе Ти испеам, ќе Ти свирам на харфа со десет жици.

¹⁰Ти им даруваш спасение на царевите, Ти го избави Твојот слуга Давид од остар меч.

¹¹Избави ме и отми ме од рацете на туѓинските синови, чии усти лага говореа и чија десница е десница на неправдата.

¹²Дај синовите наши да се како нови насади во младоста своја, нашите ќерки — накитени и украсени како столбови во храмот.

¹³Да ни бидат полни житниците наши, во изобилие со секаква храна; да се плодат овците наши по пасиштата свои.

¹⁴И воловите да ни се угоени, да нема паѓање на оградите, ни ропство, ниту офкање по улиците наши.

¹⁵Блажен е оној народ, кој го има тоа! Блажен е оној народ, на кого Господ му е Бог!