Read Свето Писмо: Стандардна Библија 2006 (со девтероканонски книги) Псалми 33 Bible Online

Псалми 33 - Свето Писмо: Стандардна Библија 2006 (со девтероканонски книги) bible

Псалми 33

¹Ќе го благословувам Господа во секое време; похвала за Него секогаш ќе има во мојата уста.

²Со Господ ќе се фали душата моја! Нека го чујат тоа понизните и нека се зарадуваат.

³Величајте Го Господа со мене, и заедно да го возвишуваме името Негово.

⁴Го побарав Господа, и Тој ме чу и од сите стравови мои ме избави.

⁵Кон Него погледнете и разведрете се, и лицата ваши нема да се посрамат.

⁶Несреќниот вика и Господ го слуша и го спасува од сите негови неволји.

⁷Ангел Господов се улогорува околу оние, кои се бојат од Него, и ги спасува.

⁸Вкусете и ќе видите, колку е добар Господ! Блажен е оној човек, кој кај Него прибегнува!

⁹Имајте страхопочит кон Господ, сите праведници Негови, зашто ништо нема да им недостига на оние кои имаат страхопочит кон Него.

¹⁰Осиромашија и огладнеа богатите, а оние што Го побараа Господа, не ќе бидат лишени од секакви добра.

¹¹Дојдете, чеда, послушајте ме: јас ќе ве научам да имате страхопочит кон Господ.

¹²Сака ли човек да живее и да види добри денови,

¹³нека си го воздржува јазикот од зло и устата своја од лаги,

¹⁴нека се клони од зло и нека прави добро; да бара мир и да врви по него.

¹⁵Очите на Господ се насочени кон праведните, и ушите Негови — кон молитвите нивни.

¹⁶Но лицето на Господ е против оние што вршат зло; ќе го истреби од Земјата споменот за нив.

¹⁷Кога викаат праведните, Господ ги слуша и ги спасува од сите маки нивни.

¹⁸Блиску е Господ до оние со скршено срце, и смирените по дух ќе ги спаси.

¹⁹Бројни се маките на праведните, но од сите нив Господ ќе ги избави.

²⁰Господ ги чува сите коски нивни; ниедна од нив нема да се скрши.

²¹Злото му носи смрт на грешникот; оние, што го мразат праведниот, ќе платат.

²²Господ ќе ги спаси душите на слугите Свои, и никој од оние, кои прибегнуваат кон Него, нема да биде осуден.