Read Свето Писмо: Стандардна Библија 2006 (со девтероканонски книги) Псалми 36 Bible Online

Псалми 36 - Свето Писмо: Стандардна Библија 2006 (со девтероканонски книги) bible

Псалми 36

¹Не жести се поради злобниците и не завидувај им на оние што вршат беззаконие,

²зашто тие ќе се исушат како трева, и како зелје набргу ќе свенат.

³Верувај во Господ и прави добро, за да живееш на земјата и да уживаш во спокојство.

⁴Сета радост нека ти биде во Господ, и Тој ќе ти даде, што ќе посака срцето твое.

⁵Довери Му го патот свој на Господ и во Него верувај и Тој ќе делува;

⁶и ќе ја изведе правдата твоја како светлина, и справедливоста твоја — како пладне.

⁷Биди кроток пред Господ и на Него надевај се. Не жести се на оној, кој успева на патот свој, на човек кој врши беззаконие.

⁸Воздржи се од лутина и остави ја јароста, не жести се — самиот да не правиш зло,

⁹зашто оние што вршат зло, ќе бидат истребени, а оние, кои се надеваат на Господ, ќе ја наследат Земјата.

¹⁰Уште малку, и грешникот ќе го нема; ќе го побараш местото негово и нема да го најдеш.

¹¹А кротките ќе ја наследат земјата и ќе се насладуваат во изобилен мир.

¹²Грешникот смислува зло против праведниот и чкрта со забите против него,

¹³но Господ му се потсмева, зашто однапред гледа дека му се ближи крајот.

¹⁴Грешниците ги вадат мечевите, го оптегнуваат лакот свој за да го кутнат бедниот и сиромавиот, за да ги прободат оние што се со чисто срце.

¹⁵Но мечот нивни ќе се забие во нивното срце, и лаците нивни ќе се скршат.

¹⁶Малото богатство кај праведниот е многу подобро отколку големото богатство на грешниците.

¹⁷Зашто мишките на грешниците ќе спласнат, а на праведниците Господ им ги поткрепува.

¹⁸Господ ги знае патиштата на непорочните; и нивното наследство ќе биде вечно:

¹⁹во зло време нема да бидат посрамени и во деновите на глад ќе бидат сити;

²⁰зашто грешниците ќе загинат, и непријателите Господови ќе ги снема како полска убавина, ќе исчезнат како дим.

²¹Грешникот зема на заем и не враќа, а праведниот е милостив и дава,

²²зашто оние, кои Господ Го благословуваат, ќе ја наследат земјата, а оние што тој ги проколнува, ќе бидат истребени.

²³Господ ги зацврстува стапките на човекот и мили Му се неговите патишта:

²⁴па и ако се сопне, нема да падне, зашто Господ го држи за рака.

²⁵Бев млад, и остарев, но не видов оставен праведен човек ниту децата негови леб да просат;

²⁶тој секој ден знае да се смилува и на заем да дава, и потомството негово ќе биде благословено.

²⁷Клони се од зло и прави добро, па ќе живееш вечно;

²⁸зашто Господ ја сака правдата и не ги остава верниците Свои; нив вечно ќе ги чува. А беззакониците ќе бидат исфрлени и потомството на безбожниците ќе биде истребено.

²⁹Праведните ќе ја наследат земјата и ќе живеат на неа вечно.

³⁰Устата на праведниот кажува мудрост, а јазикот негов изговара правда.

³¹Законот на неговиот Бог е во срцето негово; стапките негови нема да се сопнат.

³²Грешникот го демне праведниот и бара да го убие;

³³но Господ нема да го предаде во негови раце и нема да го осуди, кога ќе биде суден.

³⁴Надевај се на Господ и остани на Неговите патишта; Тој ќе те воздигне за да ја наследиш земјата; и ќе го гледаш истребувањето на грешниците.

³⁵Видов страшен безбожник, кој се превознесуваше и издигаше како кедар леванонски.

³⁶Поминав и, ете, го нема; го побарав, и не го најдов.

³⁷Види го непорочниот, гледај го праведниот: има напредок за мирниот;

³⁸а безбожниците сите ќе бидат истребени, нивното наследство ќе се затре.

³⁹Спасението, пак, на праведните доаѓа од Господ и Тој е нивни заштитник во тешко време;

⁴⁰им помага Господ и ги избавува; ги избавува од грешниците и ги спасува, зашто кај Него прибегнуваат.