Read Свето Писмо: Стандардна Библија 2006 (со девтероканонски книги) Псалми 37 Bible Online

Псалми 37 - Свето Писмо: Стандардна Библија 2006 (со девтероканонски книги) bible

Псалми 37

¹Господи, во јароста Своја не карај ме и во гневот Свој не казнувај ме,

²зашто стрелите Твои се забија во мене, и Твојата рака тежи врз мене,

³нема ништо здраво на моето тело од Твојот гнев; во коските мои нема мир поради гревот мој;

⁴зашто беззаконијата мои ја надвишија главата моја, како тешко бреме ме притиснаа.

⁵Смрдат и гнојат раните мои поради безумието мое.

⁶Се згрбавив и се стопив сосема, цел ден натажен одам;

⁷слабината ми е воспалена, нема здраво место на телото мое.

⁸Исцрпен сум и дотолчен; рикав поради воздишките на срцето мое.

⁹Господи, пред Тебе се сите мои копнежи, и мојата воздишка не е сокриена од Тебе.

¹⁰Срцето засилено ми бие, ме напушти силата моја, и светлината на очите мои, — и неа ја нема во мене.

¹¹Моите пријатели и моите ближни се приближија и не се доближија; застанаа подалеку од мене,

¹²а оние што ја бараат душата моја, ми поставуваат примки, говорат за пропаст и секој ден кројат сплетки;

¹³а јас, пак, како глув не слушам и како нем сум, кој не ја отвора устата своја;

¹⁴станав како човек што не слуша и што во устата своја нема одговор,

¹⁵зашто на Тебе, Господи, се надевам; Ти ќе одговориш, Господи, Боже мој.

¹⁶Зашто се молам само да не се погордеат над мене моите непријатели; и кога ќе ми се поколебаат нозете мои, тие да не се кренат над мене.

¹⁷Готов сум да паднам, и болот мој секогаш е со мене.

¹⁸Беззаконието свое го признавам и ќе жалам поради гревот мој.

¹⁹А оние што ми се непријатели без причина, се силни и се намножија оние што неправедно ме мразат,

²⁰ми враќаат зло за добро, ми станаа противници, зашто јас сум за добро.

²¹Не оставај ме, Господи, Боже мој, не оддалечувај се од мене;

²²побрзај да ми помогнеш, Господи, Спасителе мој!