Read Свето Писмо: Стандардна Библија 2006 (со девтероканонски книги) Псалми 49 Bible Online

Псалми 49 - Свето Писмо: Стандардна Библија 2006 (со девтероканонски книги) bible

Псалми 49

¹Бог над боговите, Господ, говори и ја повикува Земјата од сончевиот изгрев до запад.

²Од Сион, кој е врв на убавината, заблескува Бог;

³доаѓа нашиот Бог, и нема да молчи; пред Него ќе има оган што проголтува, околу Него бура.

⁴Тој ќе ги повика небото горе и Земјата, за да му суди на Својот народ:

⁵„Соберете ги кај Мене светиите Мои, кои Ми се заветуваа преку жртва!“

⁶И небесата ќе ја огласат Неговата праведност, зашто Бог е судија.

⁷„Чуј, народе Мој, и Јас ќе говорам, Израиле, ќе сведочам против тебе: Јас сум Бог, Твој Бог.

⁸Нема да те прекорувам поради твоите жртви; твоите сепаленици секогаш се пред Мене;

⁹нема потреба да примам телци од твојот дом, ниту козли од стадата твои,

¹⁰зашто Мои се сите горски ѕверови и добитокот по горите и говедата.

¹¹Ги познавам сите птици небески, и убавината на полињата е пред Мене,

¹²ако огладнам, нема да ти кажам тебе, зашто Моја е вселената и сѐ што ја исполнува.

¹³Зар Јас јадам јунешко месо и пијам крв јарешка?

¹⁴Принеси Му на Бога благодарствена жртва и исполнувај ги своите завети пред Севишниот.

¹⁵И повикај Ме во тежок ден; Јас ќе те избавам, а ти ќе Ме прославиш.“

¹⁶А на грешникот Бог му вели: „Зошто напамет ги кажуваш Моите одредби и со уста го спомнуваш Мојот завет?“

¹⁷А самиот ја мразиш поуката Моја и зад грб ги фрлаш зборовите Мои?

¹⁸Кога ќе видиш крадец, се зближуваш со него и со прељубници се дружиш;

¹⁹устата твоја е полна со злоба, и јазикот твој измами плете;

²⁰седиш и го клеветиш братот свој, синот на својата мајка го озборуваш.

²¹Ти го изврши тоа, а јас молчев; ти си помисли дека Јас сум, каков што си ти. Ќе те изобличам и ќе ти ги изнесам пред лицето твое гревовите твои.

²²Разберете го ова вие, кои Го заборавате Бога, за да не ве раскине, па тогаш ќе нема избавител.

²³Кој принесува жртва благодарствена, тој Ме прославува, и кој го следи Мојот пат, нему ќе му го соопштам Божјото спасение.