Read Свето Писмо: Стандардна Библија 2006 (со девтероканонски книги) Псалми 62 Bible Online

Псалми 62 - Свето Писмо: Стандардна Библија 2006 (со девтероканонски книги) bible

Псалми 62

¹Боже, Ти си мојот Бог, Тебе Те барам; за Тебе зажедне душата моја. За Тебе копнее телото мое како земја пуста, неплодна и безводна!

²И така со поглед Те барав во Светилиштето Твое, за да ја видам Твојата сила и Твојата слава.

³Зашто милоста Твоја е подобра од животот, устата моја ќе Те фали.

⁴Така ќе Те благословувам во животот мој, и во Твое име ќе ги кревам рацете мои.

⁵Како со маст и масло се наситува душата моја, и со радосен глас ќе те фали устата моја.

⁶Кога ќе се сетам за Тебе во постелата моја, во ноќните часови за Тебе размислувам,

⁷зашто Ти си ми помошник и под сенката на Твоите крилја Ти пеам.

⁸Кон Тебе се прилепува душата моја, твојата десница ме поддржува.

⁹А оние кои сакаат да ме лишат од мојот живот, ќе слезат во длабочината на Земјата.

¹⁰Ќе бидат предадени на силата на мечот; ќе станат плен на чакалите.

¹¹А царот ќе се зарадува во Бога, и секој ќе се фали, кој во Него се колне, бидејќи ќе замолкне устата на лажливците.