Read Свето Писмо: Стандардна Библија 2006 (со девтероканонски книги) Псалми 63 Bible Online

Псалми 63 - Свето Писмо: Стандардна Библија 2006 (со девтероканонски книги) bible

Псалми 63

¹Чуј го, Боже, гласот мој, кога Ти се молам; зачувај ми го животот мој од непријателот што ме застрашува.

²Сокриј ме од тајните завери на грешниците, од плановите на злочинците.

³Тие ги наострија јазиците свои како меч, тие исфрлаат ранливи зборови, како стрели,

⁴за да стрелаат скришно на непорочниот; тие стрелаат ненадејно врз него, без страв.

⁵Тие цврсто се договорија за зло; се договорија како да ја прикријат замката, па си рекоа: кој ќе нѐ види?

⁶Сонуваат за злодела, скришни заговори кројат. Зашто, човековото срце и ум се длабока бездна.

⁷Но Бог ќе ги застрела, ќе ги рани ненадејно.

⁸Сопствениот јазик пропаст ќе им донесе; сите оние што ќе ги видат, ќе се стаписаат.

⁹И секој човек ќе се уплаши. Ќе се раскажува за делата Божји и ќе размислуваат за она што Тој го изврши.

¹⁰А праведниот ќе се развесели во Господ и ќе прибегне кај Него; и ќе се веселат сите кои се праведни по срце.