Read Свето Писмо: Стандардна Библија 2006 (со девтероканонски книги) Псалми 68 Bible Online

Псалми 68 - Свето Писмо: Стандардна Библија 2006 (со девтероканонски книги) bible

Псалми 68

¹Спаси ме, Боже, зашто водите стигнаа до гушата моја!

²Потонав во длабока тиња, каде што нема дно; влегов во морска длабочина и бура ме потопи.

³Изнемоштев од викање; засипна грлото мое; попуштија очите мои, чекајќи Го мојот Бог.

⁴Оние, што ме мразат без причина, се намножија повеќе од косата на главата моја: непријателите мои, кои ме гонат неправедно, се засилија; она што не сум го зел, бараат да го вратам!

⁵Боже, Ти го знаеш моето безумие, и гревовите мои не се сокриени од Тебе.

⁶Да не се посрамат поради мене сите оние, што се надеваат на Тебе, Господи, Боже на силите. Да не се посрамат поради мене оние, кои Те бараат, Боже Израилев,

⁷зашто заради Тебе поднесувам исмејување, и срам го обзеде лицето мое.

⁸Туѓ станав за браќата свои, туѓинец за синовите на мајка ми моја.

⁹Бидејќи ревноста за Твојот дом ме изеде, и навредите на оние што Те хулат, паѓаат врз мене;

¹⁰и постам со душата своја, но и тоа ми го земаат за зло.

¹¹Место облека облекувам вреќа; и со тоа им станав за приказ;

¹²против мене зборуваат оние што седат пред портите и пијаниците пеат за мене.

¹³Јас, пак, молитвата моја ја упатувам кон Тебе, Господи; во благопријатно време, Боже, со големата Своја милост услиши ме заради вистината на спасението од Тебе;

¹⁴изведи ме од калта за да не потонам; да се избавам од оние, кои ме мразат, а и од длабоките води;

¹⁵за да не ме потопи водниот вртеж, и длабината да не ме проголта, да не ја затвори над мене бездната својата уста.

¹⁶Услиши ме, Господи, зашто блага е Твојата милост; поради големата Твоја милосрдност погледај ме;

¹⁷не одвраќај го лицето Свое од слугата Твој, зашто сум потиштен; услиши ме брзо;

¹⁸наклони се кон душата моја и искупи ја; поради моите непријатели, спаси ме.

¹⁹Зашто Ти го знаеш мојот подбив, мојот срам и моето засрамување: познати Ти се сите мои непријатели.

²⁰Навредите ми го скршија срцето; очаен сум, очекувајќи некој да ми се сожали, но го немаше, и да ме утеши некој, но не го најдов.

²¹И ми дадоа жолчка да јадам и кога зажеднев — со оцет ме напоија.

²²Трпезата нивна нека им биде примка, гоштевањето — стапица;

²³да им се помрачат очите, та да не гледаат, и бедрата нивни ослаби ги засекогаш;

²⁴излиј го врз нив гневот Свој, и јароста на Твојот гнев нека ги обземе;

²⁵домовите да им ги запустиш, и во шаторите нивни да не остане никој жив;

²⁶зашто оној кого Ти го порази, тие го гонат, и со тоа ги умножија болките од раните мои.

²⁷Притури вина врз вината нивна, за да не добијат прошка од Тебе.

²⁸Нека бидат избришани од книгата на живите и да не бидат запишани меѓу праведните.

²⁹Јас, пак, сум беден и страдам; нека дојде од Тебе, Боже, спасението за мене!

³⁰Ќе го славам името на мојот Бог со песна, ќе го возвеличувам во благодарност,

³¹и тоа ќе Му биде поугодно на Господ, отколку теле или јунец со рогови и со копита.

³²Нека го видат тоа оние што страдаат и нека се зарадуваат. Нека ви живнат срцата вам, кои Го барате Бога,

³³зашто Господ ги слуша сиромасите и не ги презира затворениците Свои.

³⁴Нека Го слават небесата и земјата, морето и сѐ што живее во него;

³⁵зашто Бог ќе го спаси Сион, ќе се изградат градови во Јудеја, и таму ќе ги наследат;

³⁶и ќе се веселат таму оние што го сакаат името Негово.