Read Свето Писмо: Стандардна Библија 2006 (со девтероканонски книги) Изреки 10 Bible Online

Изреки 10 - Свето Писмо: Стандардна Библија 2006 (со девтероканонски книги) bible

Изреки 10

¹Мудар син го радува татко си, а безумниот син е тага на мајка си.

²Неправедно стекнато богатство не донесува полза, а правдата од смрт спасува.

³Господ не допушта да гладува душата на праведникот, но богатството на безбожниците го одзема.

⁴Мрзливата рака донесува сиромаштија, а раката на работливиот збогатува. [4a] Казнуваниот син мудар ќе биде и слугата безумен тој ќе го држи.

⁵Кој собира преку летото, е разумен син, а кој спие за време на жетва, е неразумен син.

⁶Благослов почива врз главата на праведниот, а насилство им ја затвора устата на беззакониците.

⁷Споменот за праведниот ќе биде благословен, а името на нечестивите ќе биде проколнато.

⁸Мудриот по срце прима заповеди, а неразумниот, кој брбори, ќе се сопне.

⁹Кој оди во непорочност, оди без страв; а кој ги искривува патиштата свои, ќе биде казнет.

¹⁰Кој намигнува со очите, беда донесува, а кој глупаво зборува — пропаѓа.

¹¹Устата на праведникот е извор на животот, а насилството им ја затвора устата на беззакониците.

¹²Омразата предизвикува раздори, а љубовта ги покрива сите гревови.

¹³Во устата на разумниот има мудрост, а за грбот на глупавиот — стап.

¹⁴Мудрите го чуваат знаењето, а устата на глупавиот е близу до смртта.

¹⁵Имотот на богатиот е негов утврден град, а пропаст за бедните е нивната сиромаштија.

¹⁶Трудот на праведникот води кон живот, успехот на нечестивиот — кон грев.

¹⁷Кој ја пази поуката, тој е на патот кон животот; а кој го отфрла разобличувањето — сѐ губи.

¹⁸Кој крие омраза, има лажлива уста; а кој шири клевети, е глупав.

¹⁹При многу зборување не се избегнува гревот, а разумен ќе бидеш ако ја воздржуваш устата своја.

²⁰Јазикот на праведниот е одбрано сребро, а срцето на нечестивите — нема вредност.

²¹Устата на праведниот поучува мнозина, а глупавите умираат од недостиг на разум.

²²Благословот Господов — збогатува, и не донесува со себеси тага.

²³Глупавиот со веселба го прави она што е престапно, а на разумниот човек мудроста му е својствена.

²⁴Од она од што се плаши нечестивиот, тоа ќе го снајде, а желбата на праведниците ќе се исполни.

²⁵Како што виорот минува, така и нечестивиот ќе исчезне; а праведникот е врз вечни основи.

²⁶Она што е оцетот за забите и димот за очите, тоа е мрзливиот за оние што го праќаат.

²⁷Стравот Господов додава денови, а годините на нечестивите ќе се скратат.

²⁸Очекувањето на праведниците е радост, а надежта на нечестивите ќе загине.

²⁹Патот Господов е крепост за непорочниот, а пропаст за оние, што вршат беззаконие.

³⁰Праведниот нема да се поколеба никогаш, а лошите нема долго да живеат на земјата.

³¹Од устата на праведникот тече мудрост, а развратниот јазик ќе биде пресечен.

³²Устата на праведникот го познава благопријатното, устата на нечестивите — развратното.