Read Свето Писмо: Стандардна Библија 2006 (со девтероканонски книги) Изреки 13 Bible Online

Изреки 13 - Свето Писмо: Стандардна Библија 2006 (со девтероканонски книги) bible

Изреки 13

¹Мудриот син ја слуша татковата поука, а непослушниот не го слуша прекорот.

²Од плодот на устата своја човекот ќе вкуси добро, а душата на беззаконикот е полна со насилство.

³Кој ја чува устата своја, тој ја чува душата своја; а кој широко ја отвора устата своја, тешко нему.

⁴Душата на мрзливиот посакува, но напразно; а душата на работливиот ќе се насити.

⁵Праведниот го мрази лажливиот збор, а безбожниот се однесува бесрамно и одвратно.

⁶Правдата го чува непорочниот, а безбожноста го погубува грешникот.

⁷Некој се покажува богат, а нема ништо; друг се прикажува за сиромав, а има големо богатство.

⁸Понекогаш богатиот со пари го откупува својот живот, додека сиромавиот не треба од тоа да се плаши.

⁹Светлината на праведниците свети силно, а светилото на нечесните згаснува. [9a] Подмолните души лутаат во гревови, а праведните се сожалуваат и се смилостивуваат.

¹⁰Од гордоста произлегува кавга, а мудроста е во оние што примаат совет.

¹¹Богатството, спечалено со беззаконие, се намалува, а кој собира со труд, го зголемува.

¹²Надежта, долго неостварена, го изнемоштува срцето, а исполнетата желба е како дрво на животот.

¹³Кој не води грижа за словото, тој си штети, а кој се бои од заповедта, нему ќе му се даде награда.

¹⁴На лукавиот син ништо не му е добро, а на мудриот домаќин делата му успеваат и патот му е прав.

¹⁵Поуката на мудриот е извор на животот; таа го избавува од мрежите на смртта.

¹⁶Добриот разум донесува пријатност, а патот на беззакониците, води во пропаст.

¹⁷Секој благоразумен работи со знаење, а глупавиот се истакнува со глупости.

¹⁸Лош гласник носи беда, а верен гласник е спасение.

¹⁹Немаштија и срам за оној, што го отфрла учењето; а оној, кој ја пази поуката, ќе се прослави.

²⁰Исполнетата желба е пријатна за душата, но на глупавите им е тешко да го одбегнуваат злото.

²¹Кој се состанува со мудри, мудар ќе биде; а кој другарува со безумни, глупав ќе биде.

²²Грешниците злото ги гони, а на праведниците им се враќа добро.

²³Добриот остава наследство и на внуци, а богатството на грешникот се чува за праведните.

²⁴Праведните имаат богатство многу години, неправедните бргу го загубуваат.

²⁵Кој ја жали прачката, го мрази синот свој; а кој го сака, го казнува од детските години.

²⁶Праведникот јаде до наситување, а стомакот на беззакониците трпи од недостиг.