Read Свето Писмо: Стандардна Библија 2006 (со девтероканонски книги) Изреки 28 Bible Online

Изреки 28 - Свето Писмо: Стандардна Библија 2006 (со девтероканонски книги) bible

Изреки 28

¹Безбожниот бега, кога никој не го гони; а праведниот е смел како лав.

²Кога земјата ќе отстапи од законот, тогаш во неа има многу началници; а при разумен и вешт маж управата е долговечна.

³Човек сиромав кој врши зло над слабите е исто како излеан дожд, кој нанесува штета.

⁴Отстапниците од законот ги фалат нечесните, а оние што го почитуваат законот, негодуваат против нив.

⁵Лошите луѓе не ја разбираат справедливоста, а оние што Го бараат Господа, разбираат сѐ.

⁶Подобро сиромав, кој оди во својата непорочност, отколку оној што ги искривува своите патишта, макар и да е богат.

⁷Кој го пази законот, е разумен син, а кој се дружи со расипници, го срами татко си.

⁸Кој го умножува имотот свој преку камата и лихварство, тој го собира за добротворецот на сиромасите.

⁹Кој го отстранува увото свое да не го слуша законот, на таквта и молитвата му е одвратна.

¹⁰Кој ги упатува праведните кон патот на злото, сам ќе падне во јамата своја, а непорочните ќе наследат добро.

¹¹Богатиот човек самиот се смета за мудрец, но умен сиромав ќе го разобличи.

¹²Кога праведници победуваат, голема е славата, но кога безбожниците се издигаат, луѓе гинат.

¹³Кој ги крие престапите свои, нема да напредува; а кој се кае и ги остава, ќе биде помилуван.

¹⁴Блажен е оној човек, кој секогаш се бои; а кој го ожесточува срцето свое, ќе падне во неволја.

¹⁵Лав што рика и мечка гладна, тоа е безбожниот властодржец над беден народ.

¹⁶Неразумен управител врши многу угнетувања, а кој го мрази користољубието, ќе има долги дни.

¹⁷Човекот, виновен за пролевање на човечка крв, бега до гроб, за да не го фати некој. [17a] Казнувај го синот свој и ќе те засака; ќе ја весели твојата душа — нема нечесните да ги слуша.

¹⁸Кој оди непорочно, ќе биде неповреден; а кој оди по криви патишта, ќе падне на еден од нив.

¹⁹Кој си ја обработува земјата, ќе се наситува со леб, а кој е мрзлив и не работи, ќе се насити со сиромаштија.

²⁰Верен човек ќе биде многу благословуван, а кој брза да се збогати, не останува без казна.

²¹Не е добро да се биде лицемерен: таков човек и за парче леб ќе изврши неправда.

²²Завидлив човек брза кон богатството и не мисли дека сиромаштијата ќе го стигне.

²³Кој разобличува човек, отпосле ќе најде поголема благонаклоност, отколку оној што му ласка со јазикот.

²⁴Кој го краде татко си и мајка си и вели: „Тоа не е грев“, тој им е соучесник на грабителите.

²⁵Горделивиот предизвикува караници, а кој се надева на Господ, ќе преуспее.

²⁶Кој се надева на себеси, безумен е; а кој постапува мудро, ќе биде спасен.

²⁷Кој дава на сиромав, нема да осиромаши; а кој ги крие очите од него, ќе биде проколнуван.

²⁸Кога безбожните се издигаат, луѓето се кријат, а кога паѓаат, праведниците се умножуваат.