Read Свето Писмо: Стандардна Библија 2006 (со девтероканонски книги) Мудрост Соломонова 13 Bible Online

Мудрост Соломонова 13 - Свето Писмо: Стандардна Библија 2006 (со девтероканонски книги) bible

Мудрост Соломонова 13

¹Сите луѓе по природа се суетни, оние кои не Го спознавале Бога, (Кој постои од вечноста), и тие кои од видливите добра не можеле да го спознаат оној Кој е, па гледајќи ги Неговите дела, не Го познавале Него Уметникот,

²туку ги почитувале за богови, кои управуваат со светот: или огнот, или ветрот, или подвижниот воздух, или ѕвездениот круг, или силните води или небеските светила.

³Зашто ако, восхитувајќи се на нивната убавина, тие сили ги почитуваа за богови, тогаш тие требаше да познаат колку е Господ подобар од нив, зашто Тој, Уметникот на убавото — ги создал и нив.

⁴Ако, пак, се чудеа на силата нивна и на нивното дејство, тие требаше од нив да разберат колку посилен е Оној, Кој нив ги создал,

⁵бидејќи според величината и убавината на созданијата може по сличност да се познае Создателот на нивното битие.

⁶Но, сепак тие заслужуваат помал прекор, зашто можеби се заблудуваат, кога Го бараат Бога, сакајќи да Го најдат,

⁷зашто, свртувајќи се кон Неговите дела, тие испитуваат и се убедуваат преку своите очи дека сѐ видливо е прекрасно.

⁸Но, сепак, не треба да им се прости.

⁹Бидејќи, ако можеле да придобијат толкаво знаење, така што можеле да го проучуваат привремениот свет, зошто тогаш веднаш не Го нашле неговиот Господар?

¹⁰Но, навистина, за жалење се оние, кои својата надеж ја полагаат на бездушни творби, кои делата на човечки раце ги нарекуваат богови — златото и среброто, уметнички обработени ликови на животни или безвреден камен, изделкан од човечка рака.

¹¹Или, пак, кога дрводелец некој отсече погодно дрво, грижливо му ја симне целата кора и, откако го изработи убаво, од него направи сад за некаква корисна употреба во животот,

¹²а деланките од работата ги употреби за готвење храна и потоа се нахрани,

¹³но една од тие деланки, негодна за ништо, криво дрво и глуждливо, го зема и во слободното време го изделкува со опитност вешта, па сличен го направи на човечки лик,

¹⁴или го направи да личи на некое долно животно, го премачкува со оловна боја, потоа со црвена, му отстранува секој недостаток,

¹⁵и, откако приготви погодно за него место, го закачува на ѕидот, прицврстувајќи го претходно со железо.

¹⁶И така, за да не падне неговото дело, однапред се грижи за него, бидејќи знае дека тоа самото не може да си помогне, зашто е идол и има потреба од помош.

¹⁷А молејќи се пред него за својот имот, за женидба и деца, тој не се срамува да му говори на тоа дрво што е без душа,

¹⁸и да бара здравје од она што е немоќно, од мртвото — да бара живот, и помош да бара од она што е беспомошно, да го моли за добро патување она што не може чекор да направи,

¹⁹за придобивка, за работа и за успех на рацете, коешто воопшто не може со раце да работи, за сила да го моли — најнемоќното.