Read Свето Писмо: Стандардна Библија 2006 (со девтероканонски книги) Мудрост Соломонова 3 Bible Online

Мудрост Соломонова 3 - Свето Писмо: Стандардна Библија 2006 (со девтероканонски книги) bible

Мудрост Соломонова 3

¹А душите на праведниците се во Божја рака; до нив нема да се допре никаква мака.

²Во очите на неразумните, тие се како умрени, а нивниот крај се сметаше за пропаст;

³и тоа што тие заминуваат од нас — како уништување, но тие живеат во мир.

⁴Зашто иако во очите на луѓето се казнуваат, надежта нивна полна е со бесмртност.

⁵Бидејќи малку казнети, тие ќе добијат големи добра, зашто Господ ги проверил и ги нашол достојни за Себе.

⁶Тој ги проверил како злато во печка и ги примил како најсовршена жртва.

⁷Во времето на Неговата посета, тие ќе светкаат како искри среде стрниште.

⁸На племиња ќе им судат, над народи ќе владеат, а над нив Господ ќе царува довека.

⁹Оние што се надеваат на Него, ќе ја познаат вистината, а кои Му се верни — ќе живеат во љубов со Него, зашто Тој има милост и милосрдност (за Своите светии и промисла -) за Своите избраници.

¹⁰А безбожниците ќе бидат казнети за своите мисли; затоа што го презреа праведниот и отстапија од Господ.

¹¹Зашто оние што ја презираат мудроста и поуката — несреќни се и надежта нивна е празна, и трудовите — бесплодни, а делата — некорисни.

¹²Нивните жени се неразумни, а децата лоши; проколнат е нивниот дом.

¹³Блазе на неродилка, која не се осквернила, која не познала незаконска постела; таа ќе добие плод — кога светите души ќе бидат наградувани.

¹⁴Блазе на евнух, кој не направил беззаконие со рака и не помислил ништо лошо против Господ; за неговата вера ќе му биде дадена посебна благодат и најпријатен дел во храмот на Господ.

¹⁵Плодот на добрите трудови е славен, а коренот на мудроста е неподвижен.

¹⁶Децата на прељубниците ќе бидат несовршени, а плодот на беззаконата постела пропаѓа.

¹⁷Макар биле и долговечни, за ништо нема да ги сметаат; нивната длабока старост ќе биде без почит.

¹⁸А ако умрат рано, нема за нив надеж, ниту утеха на судниот ден;

¹⁹зашто страшен е крајот на грешниот род.