Read Свето Писмо: Стандардна Библија 2006 (со девтероканонски книги) Мудрост Соломонова 4 Bible Online

Мудрост Соломонова 4 - Свето Писмо: Стандардна Библија 2006 (со девтероканонски книги) bible

Мудрост Соломонова 4

¹Подобро е бездетност со добродетел, зашто споменот за неа е бесмртен, таа се признава и од Бога и од луѓето.

²Кога е овде, на неа се угледуваат, кога ќе си отиде — се стремат кон неа, овенчана со вечност — вечно прославувана, зашто победила преку непорочни подвизи.

³А од многубројното потомство на безбожниците нема никаква полза; потомците на прељубниците не пуштаат длабоки корења и немаат тврда основа.

⁴Зашто, ако набрзина пуштаат гранки, слабо вкоренети, ќе се расклатат од ветрот, и од ударите на силните ветрови — ќе бидат искорнати.

⁵Кревките гранки ќе се искршат, плодот ќе им биде бесполезен, незрел за храна и непотребен за ништо;

⁶зашто деца родени од незаконска постела — сведоци се за развратот на своите родители при истрагата на судот.

⁷А праведникот и рано да умре, ќе биде во мир,

⁸зашто чесната старост не е во долговечноста, ниту се мери со бројот на годините.

⁹Мудроста — тоа се белите човечки коси, а непорочниот живот — зрела старост.

¹⁰Откако Му угодил на Бога, праведникот е засакан и, откако живеал меѓу грешниците, Бог го прибрал;

¹¹грабнат е, злобата да не го измени неговиот разум или подмолноста да не ја заведе неговата душа.

¹²Зашто, постојаното правење лошо го помрачува доброто, а виорот на копнежот го развратува незлобивиот ум.

¹³Кој достигнал совршенство за кратко време, тој живеел долго;

¹⁴зашто неговата душа Му била угодна на Господ, затоа и побрзал да ја напушти од безбожноста околу него. А луѓето го видоа тоа, и не го разбраа, дури и не помислија за тоа,

¹⁵дека Бог има благодат и милост за Своите светии и обзир — за Своите избраници.

¹⁶Праведникот, кој умира, ги осудува живите безбожници и младоста што предвремено завршила, претворајќи се во — долговечна старост на неправедникот,

¹⁷зашто тие ќе го видат крајот на мудриот и не ќе сфатат што определил Господ за него и зошто го поставил во безопасност;

¹⁸тие ќе видат и ќе го понижат, но Господ ќе им се потсмее;

¹⁹и потоа тие ќе бидат презрен труп и срам меѓу умрените довека, зашто Тој ќе ги турне и тие ќе паднат безгласно ничкум — ќе ги оттргне од нивната основа и тие најпосле ќе опустеат, ќе бидат во жалост и споменот за нив ќе загине;

²⁰сознавајќи ги своите гревови, тие ќе застанат со страв и нивните беззаконија нив самите ќе ги осудат.