Read Свето Писмо: Стандардна Библија 2006 (со девтероканонски книги) Мудрост Соломонова 6 Bible Online

Мудрост Соломонова 6 - Свето Писмо: Стандардна Библија 2006 (со девтероканонски книги) bible

Мудрост Соломонова 6

¹Затоа, слушајте, цареви, и разберете, поучете се, судии, од краиштата на земјата.

²Внимавајте вие што владеете со множествата и кои се фалите со бројноста на вашите народи!

³Господ е Оној, Кој ви ја подари власта, а силата е од Севишниот; Тој ги проучува вашите дела и ги проверува вашите намери.

⁴Иако бевте служители на Неговото царство, не судевте право, не го држевте законот и не постапувавте според Божјите заповеди.

⁵Наскоро Тој ќе ве накаже страшно, зашто строг е судот над управниците;

⁶зашто малиот заслужува милост, а силните ќе бидат строго измачувани.

⁷Господ е над сите и од никого нема да се уплаши; Тој не се плаши од никаква величина; Тој создал и мало и големо, за сите подеднакво промислува.

⁸Управниците ги очекува строга истрага.

⁹И така, цареви, моите зборови се упатени кон вас, за да се научите на мудрост и да не грешите.

¹⁰Зашто оние кои со светост го чуваат светото, и самите ќе се осветат, а кои се поучени во тоа — ќе најдат оправдание.

¹¹Затоа копнејте по моите зборови, засакајте ги и поучете се од нив.

¹²Мудроста е блескава и не потемнува — лесно ја гледаат оние што ја сакаат, ја наоѓаат — оние што ја бараат;

¹³таа ги испреварува оние што ја бараат; прва им се покажува.

¹⁴Кој ја бара од рано утро, нема да се измачува, зашто ќе ја најде како седи пред неговата врата.

¹⁵Бидејќи и самата помисла за неа — совршенство е за разумот, а кој бдее заради неа, брзо од грижи ќе се ослободи;

¹⁶таа самата оди наоколу и ги бара достојните за неа; доброволно им се јавува на нивните патишта, со нив се среќава при секоја мисла.

¹⁷Нејзиниот почеток е — твојата најискрена желба да учиш,

¹⁸а копнежот за учење — љубов е спрема неа; а да ја љубиш значи да ги сакаш нејзините закони, а да ги пазиш нејзините закони тоа е залог за твојата бесмртност,

¹⁹а бесмртноста доближува до Бога;

²⁰затоа копнежот кон мудроста издигнува до царство.

²¹Затоа ако вие, владетели, им се радувате на престолите и скиптрите, тогаш почитувајте ја мудроста, за да царувате довека.

²²А што е мудроста и како настанала, ќе ви кажам; нема од вас да ги сокријам тајните,

²³ќе ги проучувам од самото раѓање;

²⁴ќе ти го откријам нејзиното познавање, не ќе одземам од нејзината вистина;

²⁵и нема да појдам заедно со оној што копнее од завист, таквиот нема ништо заедничко со мудроста.

²⁶Многуте мудреци се спасение за светот, а разумен цар — благосостојба е за народот.

²⁷Затоа, поучувајте се од моите зборови и ќе ви биде од полза.