Read Свето Писмо: Стандардна Библија 2006 (со девтероканонски книги) Мудрост Соломонова 7 Bible Online

Мудрост Соломонова 7 - Свето Писмо: Стандардна Библија 2006 (со девтероканонски книги) bible

Мудрост Соломонова 7

¹И јас сум смртен човек, како и сите други, потомок сум на првото создание, направено од земја.

²И јас бев обликуван во тело во мајчината утроба во тек на десет месеци, стегнат во крв од семето на маж и од наслада, соединета со сон.

³И јас, кога се родив, го вдишав заедничкиот воздух и паднав на оваа земја, првиот глас го пуштив со плач, како и сите;

⁴бев одгледан во пелени и со грижи.

⁵зашто ниеден цар не се родил поинаку;

⁶за сите има само еден влез во животот, а еднаков е и излезот.

⁷Затоа се молев — и ми беше даден разум, повикав — и врз мене слезе духот на мудроста.

⁸Мудроста ја засакав повеќе од скиптри и престоли; а богатството го сметав за ништо пред неа;

⁹скапоцен камен е неспоредлив со неа, зашто пред неа сето злато е како ништожен песок, а среброто е кал — во споредба со неа.

¹⁰Ја засакав повеќе од здравје и од убавина; ѝ дадов предност и повеќе ја засакав од светлината, зашто нејзиниот сјај никогаш не угаснува.

¹¹И заедно со неа дојдоа кај мене сите добра и големо богатство преку нејзините раце;

¹²јас им се радував на сите тие добра, зашто мудроста ме раководеше, но не знаев дека е таа нивна родителка.

¹³И она што без измама го научив, тоа и без завист го предавам; богатството нејзино не го кријам.

¹⁴Таа е неисцрпно сокровиште за луѓето; ползувајќи се од неа, тие стапуваат во пријателство со Бога препорачани преку даровите на поучувањето.

¹⁵Затоа нека ми даде Бог да говорам како што разбирам и да мислам со мисли достојни за она што ми е дарувано, зашто Тој е водач на мудроста и управувач со мудреците.

¹⁶Во Неговата рака сме и ние и наши-те зборови, сето наше разбирање и вештината во работата.

¹⁷Тој Самиот ми дава вистинско знаење за она што постои, за да го сознаам строежот на светот и дејството на прапочетоците.

¹⁸Почетокот, крајот и средината на времињата, повратните смени и промената на времињата,

¹⁹годишните кругови и положбата на ѕвездите.

²⁰Природата на животните и својствата на ѕверовите, силата на духовите и на човечките мисли, разноликоста на растенијата и лековитоста на корените.

²¹Познав сѐ што е скриено и што е јавно, зашто ме научи мудроста, уметничката на сѐ.

²²Во неа има дух разумен, свет, единороден, многустран, тенок, благоподвижен, светол, чист, јасен, неопасен, доброљубив, остар, незадржлив.

²³добродетелен, човекољубив, цврст, непоколеблив, спокоен, безгрижен, со секаква моќ, кој гледа сѐ и проникнува во сите умни, чисти и најтенки духови.

²⁴Зашто мудроста е поподвижна од секое движење и, поради својата чистота, поминува низ сѐ и во сѐ проникнува.

²⁵Таа е здив на Божјата сила и чист одлив од славата на Седржителот: затоа ништо осквернето нема да влезе во неа.

²⁶Таа е одсјај на вечната светлина, огледало чисто на Божјото дејство, слика на Божјата добрина.

²⁷Една е, а може сѐ, останувајќи во себеси, сѐ обновува и, минувајќи од поколение во поколение во светите души, таа ги подготвува Божјите пријатели и пророци;

²⁸зашто Бог не го љуби никој, освен оној што се дружи со мудроста.

²⁹Поубава е од сонцето и многу ѕвезди надминува; споредена со светлината, таа е погоре од неа;

³⁰зашто светлината со ноќта се сменува, а злобата нема сила над мудроста.