Read Свето Писмо: Стандардна Библија 2006 (со девтероканонски книги) Сирахова 11 Bible Online

Сирахова 11 - Свето Писмо: Стандардна Библија 2006 (со девтероканонски книги) bible

Сирахова 11

¹Мудроста на понизниот ја издигнува неговата глава и ќе го постави сред достоинственици. Не суди според изгледот

²Не фали го човека поради неговата убавина; а и поради неговиот изглед не презирај го.

³Мала е пчелата меѓу крилестите суштества, но таа дава сладост најслатка.

⁴Не фали се со твојата скапоцена облека и не гордеј се во денот на твојата слава; прекрасни се Божјите дела, иако се сокриени од луѓето.

⁵Многу владетели имало на земјата; многумина непознати добиле круна.

⁶Многумина силни биле понижени и славни луѓе паѓале под туѓа власт.

⁷Додека не испиташ — не обвинувај, прво провери, па потоа укорувај.

⁸Не одговарај пред да ислушаш, сред разговор не мешај се.

⁹Не препирај се за работи што не те засегаат; во расправии меѓу грешници не мешај се. Богатство и сиромаштија

¹⁰Синко, не зафаќај се со многу работи; при многу работи нема да останеш без вина. Колку и да брзаш, сѐ нема да постигнеш и со бегање — нема да се спасиш.

¹¹Некој се труди, се измачува и брза, а сѐ повеќе заостанува.

¹²Некој е слаб, потреба има од помош; сили нема и со неволји е затрупан,

¹³но Господ со милост го гледа за неговото добро, го подига од неговата понизност, ја подигнува неговата глава, поради што многумина му се восхитуваат.

¹⁴Доброто и лошото, животот и смртта, сиромаштијата и богатството — сѐ доаѓа од Господа.

¹⁵Господовиот дар е за побожните; Божјата милост вечно ќе им помага.

¹⁶Некој се збогатува со грижи и штедење; тоа е дел од неговата награда.

¹⁷Некогаш тој ќе рече: „Најдов мир и сега ќе му се радувам на моето богатство;“

¹⁸но тој не знае колку време тоа ќе трае; ќе дојде денот кога сето тоа на други ќе го остави и ќе умре. Господ може да ги промени состојбите

¹⁹Остани тврд во заветот твој и живеј во него; во својата работа дочекај старост.

²⁰На делата од грешникот не чуди се, верувај во Господа, истраен биди во твојата работа;

²¹лесно Му е на Господа бргу и ненадејно да го збогати сиромавиот.

²²Благословот од Господа — награда е за побожниот; со благословот Негов брзо успева тој.

²³Не вели: „Што уште ми треба? И какви богатства отсега можам да очекувам?“

²⁴Не вели: „Сѐ имам доволно, па какво ли зло по ова може да ме снајде?“

²⁵Во време на добро злото се заборава; во време на зло за добро не се зборува.

²⁶Лесно Му е на Господа во смртниот час да го награди човекот според делата негови.

²⁷И најмалото страдање ги потиснува насладите; во смртниот час се откриваат делата на човекот.

²⁸Додека е жив — за никого не вели дека е блажен; по децата свои се познава човекот. Избирање на познајници

²⁹Не примај секого во домот свој; на лукавиот разновидни се примките.

³⁰На горделивиот срцето е како еребица во кафез; како шпион го следи твоето паѓање;

³¹го извртува доброто во зло; и на добрите им го оцрнува лицето.

³²Од една искра станува огниште полно со жар, а грешникот мисли да пролее крв.

³³Пази се од злосторник, зашто тој зло замислува; да не те посрамоти засекогаш.

³⁴Примиш ли туѓинец во домот свој — неволји ќе ти донесе: на твоите домашни туѓинец ќе те направи.