Read Свето Писмо: Стандардна Библија 2006 (со девтероканонски книги) Сирахова 15 Bible Online

Сирахова 15 - Свето Писмо: Стандардна Библија 2006 (со девтероканонски книги) bible

Сирахова 15

¹Така постапува оној што има од Господа страв; кој законот го држи — мудрост ќе придобие.

²Ќе го пречека како мајка, ќе го прими како мудра невеста.

³Со лебот на разумот ќе го нахрани; ќе го напои со водата на мудроста.

⁴На неа ќе се потпре и нема да се поколеба; на неа ќе се надева и нема да се посрами.

⁵Таа ќе го издигне над неговите ближни; сред собир народен ќе му ја отвори устата.

⁶Тој ќе наследи веселба, и венец на радоста и име вечно.

⁷Неразумните луѓе не ја добиваат; ниту пак грешниците со очи ќе ја видат.

⁸Таа е далеку од горделивоста; лажливците не помислуваат на неа.

⁹Во устата на грешникот непријатна е пофалбата, зашто од Господа не е испратена.

¹⁰Пофалбата со мудрост искажана — и Господ ја потпомага. Човекот е одговорен за своите постапки

¹¹Никогаш не вели: „Заради Господа отстапив“, зашто она што го мрази Тој — не треба да го правиш.

¹²Не вели го ни ова: „Тој ме воведе во заблуда“, зашто Бог нема потреба од грешен човек.

¹³Секоја одвратност Господ ја мрази; таа им е непријатна на оние, коишто имаат страв од Него.

¹⁴Во почетокот Тој го создаде човекот и го препушти на неговата слободна волја.

¹⁵Ако сакаш, можеш да ги извршуваш заповедите; ти имаш сила верен да Му бидеш.

¹⁶Пред тебе ставил оган и вода; кон што сакаш, рака ќе пружиш.

¹⁷Пред човекот стои животот и смртта; што посакува, тоа му се дава.

¹⁸Голема е мудроста на Господа; Тој е сесилен и гледа сѐ.

¹⁹Очите на Господа се врз оние што имаат страв од Него; Тој ги знае сите човечки дела.

²⁰Никому не Му заповедал безбожник да биде; никому не дозволил да греши.