Read Свето Писмо: Стандардна Библија 2006 (со девтероканонски книги) Сирахова 16 Bible Online

Сирахова 16 - Свето Писмо: Стандардна Библија 2006 (со девтероканонски книги) bible

Сирахова 16

¹Божјата благонаклоност и строгост [1] Не пожелувај мноштво непримерни деца; не радувај се на синови безбожни. Не радувај се кога се намножуваат, ако во нив страв Господен нема.

²Не надевај му се на нивниот живот, и не потпирај се на нивниот број.

³Подобро е и само еден, отколку илјада;

⁴подобро е бездетен да умреш, отколку безбожни деца да имаш.

⁵Зашто од еден разумен човек град се населува; а племе од безбожни ќе го запусти.

⁶Многу вакви работи видело окото мое, а за уште повеќе увото мое слушало.

⁷На собир од грешници оган ќе се разгори, како што и кај непокорен народ гнев се распалувал.

⁸Бог не се смилува над древните џинови, кои се надеваа на својата сила и во гордоста своја од Него отстапија.

⁹Не ги поштеди ни сограѓаните Лотови; и од нив се згади поради гордоста нивна.

¹⁰Не помилува ни народ погибелен, со гревовите свои којшто се гордееше.

¹¹Ни шестотините илјади пешаци, коишто загинаа поради жестокоста на нивното срце; и да беше само еден непокорен, чудно ќе беше ако останеше неказнет;

¹²зашто и милоста и гневот се под Негова власт: силен е Бог да помилува и да излие гнев.

¹³Како што е голема милоста Негова, така е строго и неговото изобличување; на човекот му суди според неговите дела.

¹⁴Не може да побегне без казни грешникот со грабеж, ниту е залудна трпеливоста на праведникот.

¹⁵Широк е патот на Божјата милост; секој ќе добие според своите дела. Невозможно е бегањето од Господа

¹⁶Не вели: „Ќе се сокријам од Господа; зар некој од висините ќе си спомне за мене?

¹⁷Во толку народ нема да ме забележи; што сум јас во овој бескраен свет?

¹⁸Ете, небото и небото над небесата, бездната и земјата треперат од Неговата посета.

¹⁹Од страв подеднакво се тресат планините и на земјата основите кога Тој ги погледнува.

²⁰И сето ова срцето не го разбира; а патиштата Негови, Кој ќе ги сфати?

²¹Како што ветрот не го гледаме, така се сокриени и поголемиот број од делата Негови.

²²Кој ќе ни ги открие делата на неговите праведни судови? И кој ги очекува? Ветеното е далеку.“

²³Вака размислува слабоумниот. Вака глупаво размислува неразумниот и заблудениот човек. ВТОРА ЗБИРКА ОД ПОУКИ Редот во светот

²⁴Слушај ме, сине мој, и ќе научиш, со срцето свое внимавај на моите зборови.

²⁵Јас ти покажувам разумно учење и ти предавам вистинско знаење.

²⁶Во почетокот Господ ги создал сите Свои дела и на секое од нив му дал одредено место;

²⁷ги устроил засекогаш делата свои, и најдобрите болскаат од род во род: не гладуваат, не се уморуваат, постојано дејствуваат;

²⁸ниедно од нив не го ограничува она што е до него,

²⁹никогаш не се противставува на Неговите повелби.

³⁰Потоа Господ погледна на земјата и ја исполни со Своите добрини.

³¹Го покри лицето на земјата со секакви живи суштества и во неа ќе се вратат сите.