Read Свето Писмо: Стандардна Библија 2006 (со девтероканонски книги) Сирахова 2 Bible Online

Сирахова 2 - Свето Писмо: Стандардна Библија 2006 (со девтероканонски книги) bible

Сирахова 2

¹Искушението на верниот [1] Синко мој, ако сакаш да Му служиш на Господа, приготви ја душата своја за искушение.

²Подготви го срцето твое и биди цврст; не збунувај се во часот на напаствување.

³Прилепи се до Него и не отстапувај, за да бидеш прославен во последниот ден.

⁴Прифати сѐ што и да ти се случи; биди трпелив и во променливостите на твоето понижување,

⁵зашто, како што златото се испробува во оган, така Божјите избраници се проверуваат во фурната на понижувањето.

⁶Верувај во Господа, и Тој ќе ти помогне; оди по прави патишта и надевај се на Него.

⁷Вие што имате страхопочит кон Господа, чекајте ја Неговата милост; не оддалечувајте се од Него за да не загинете.

⁸Вие што имате страхопочит кон Господа, имајте доверба во Него; наградата ваша нема да изостане.

⁹Вие што имате страхопочит кон Господа, надевајте се дека ќе добиете добро, вечна радост и милост.

¹⁰Погледајте ги поранешните поколенија и видете: дали се посрамил некој што верувал во Господа? Дали некој кој имал страв од Господа, бил напуштен? И дали некогаш бил презрен оној што барал помош од Него?

¹¹Зашто Господ е милостив и милосрден; ни ги проштева гревовите и нѐ избавува во деновите на неволја.

¹²Тешко им на плашливите срца, на обесхрабрени раце и на грешник, кој оди по две патеки.

¹³Тешко му и на обесхрабреното срце; тоа не верува и затоа нема да најде закрила.

¹⁴Тешко вам што сте го загубиле трпението! Што ќе правите кога ќе ве посети Господ?

¹⁵Оние, коишто имаат страв од Господа, нема да бидат недоверливи кон Неговите зборови; оние коишто Го сакаат — одат по Неговите патишта.

¹⁶Оние, коишто имаат страв од Господа, ја исполнуваат Неговата волја, а оние што Го љубат — Го пазат законот Негов.

¹⁷Оние, коишто имаат страв од Господа, го приготвуваат своето срце и се понизуваат пред Него во својата душа, велејќи:

¹⁸„Да паднеме во рацете на Господа, а не во рацете на луѓето; зашто каква што е Неговата големина, таква е и Неговата милост.“