Read Свето Писмо: Стандардна Библија 2006 (со девтероканонски книги) Сирахова 21 Bible Online

Сирахова 21 - Свето Писмо: Стандардна Библија 2006 (со девтероканонски книги) bible

Сирахова 21

¹Одбегнувај го гревот [1] Сине мој, ако си згрешил, престани да грешиш; за направените гревови, моли се.

²Од грев бегај како од змија, зашто ако му се приближиш, тој ќе те касне.

³Гревот има лавовски заби; тој ги убива човечките души.

⁴Секое беззаконие е како меч со две острици, тоа задава рани неизлечиви.

⁵Застрашувањата и насилствата упропастуваат богатство; така се запустува и домот на горделивите.

⁶Молбата на сиромавиот стигнува сѐ до Неговите уши; а судот Негов брзо ќе дојде.

⁷Кој укорување мрази, по пат на грешници оди; а кој страхопочит кон Господа има, ќе се обрати со своето срце.

⁸Силниот на јазик оддалеку се познава, но разумниот знае кога тој ќе падне.

⁹Кој со туѓи пари куќа гради, тој е како човек кој собира камења за гробот свој.

¹⁰Собирот на беззакониците е како куп отпадоци од коноп; во пламенот огнен е нивниот крај.

¹¹Патот на грешниците добро е поплочен, но крајот негов е бездна пеколна. Мудриот и неразумниот

¹²Кој го пази законот, тој владее со своите мисли,

¹³а кој живее според страхопочитта кон Господа — мудар е.

¹⁴Неспособниот не може да се научи,

¹⁵но има способност што ја зголемува маката на човекот.

¹⁶Знаењето на мудриот како поплава се излива, а советот негов е како извор на животот.

¹⁷Срцето на глупавиот е како искршен сад: знаење не задржува.

¹⁸Кога умниот чуе мудар збор, тој го пофалува и го помни; а кога безумник го слушне, тој му се подбива и зад себе го фрла.

¹⁹На безумниот говорот е како товар на пат, зборовите на мудриот е пријатно да се слушаат.

²⁰Зборовите на мудриот на собирот ги бараат; за неговите зборови ќе размислуваат во срцето.

²¹Како куќа во урнатини, таква е на неразумниот мудроста, а знаењето негово се состои од зборови бесмислени.

²²За безумните поуката е како окови на нозете и како вериги на десната рака.

²³Глупавиот се смее на сиот глас; а разумниот — тивко се насмевнува.

²⁴За разумниот поуката е како златен накит, како скапоцен украс на десната рака.

²⁵На безумниот ногата кон куќа брза, а разумниот пристапува со скромност.

²⁶Неразумниот ѕирка низ вратата на туѓ дом, а разумниот чека надвор.

²⁷Невоспитаниот прислушнува при вратите, а умниот се срамува од тоа.

²⁸Устата на зборливите раскажува туѓи работи, а зборовите на разумниот на кантар се мерат.

²⁹Срцето на глупавите е во нивната уста, а устата на мудрите е во нивното срце.

³⁰Кога безбожникот го проколнува сатаната, се проколнува себеси.

³¹Сплеткарот својата душа ја валка, и каде и да живее — нема да биде сакан.