Read Свето Писмо: Стандардна Библија 2006 (со девтероканонски книги) Сирахова 23 Bible Online

Сирахова 23 - Свето Писмо: Стандардна Библија 2006 (со девтероканонски книги) bible

Сирахова 23

¹Господи, Оче небесни и Господаре на мојот живот, не оставај ме на нивната волја, не оставај поради нив да пропаднам.

²Кој ќе им биде камшик на моите мисли и на срцето мое — учител за мудрост, та да биде немилосрден спрема моите постапки и да нема милост кон нивните заблуди;

³та гревовите мои да не се намножуваат, и заблудите мои да не станат многу, та да паднам пред моите противници и да се радуваат моите непријатели.

⁴Господи, Оче и Боже на животот мој, не давај очите мои да се возгордеат,

⁵отстрани ги од мене сите грешни желби.

⁶Желбите на стомакот и на сладострастите да не надвладеат над мене, на душа бесрамна не предавај ме. Да се биде господар над сопствените зборови: а) Клетвите

⁷Чујте, чеда, за устата поука: кој ја пази — нема преку неа да биде уловен.

⁸Грешникот преку неа ќе биде уловен; преку неа ќе се сопнат неразумните и горделивите.

⁹Не навикнувај ја устата твоја на клетва. Колнејќи се, не изговарај го името на Светиот.

¹⁰Како што робот кога постојано го казнуваат, од рани не се ослободува, така и оној што постојано се заколнува со името на Светиот, од грев нема да се очисти.

¹¹Човек којшто често се колне, со беззаконие се исполнува; од домот негов бичот не отстапува.

¹²Ако згреши, гревот негов останува врз него; а ако, пак, не се грижи, двојно согрешува.

¹³Ако напразно се колнел, нема да му се прости; полн со неволји домот ќе му биде. б) говорот

¹⁴Има говор сличен на смрт; него да го нема во наследството на Јаков!

¹⁵Сето тоа далеку да биде од побожните луѓе, за да не се валкаат во своите гревови.

¹⁶На одвратна бесрамност не учи ја устата твоја, зашто во неа ќе има грешни зборови.

¹⁷Кога седиш меѓу големци, спомнувај си за татко си и мајка си,

¹⁸та да не се заборавиш пред нив и неволно да направиш глупост, па да посакаш да не си се родил и да го проколнуваш денот на твоето раѓање.

¹⁹Оној што ќе се навикне на срамни зборови, нема да се поправи додека е жив. Сексуалната распуштеност а) Развратен човек

²⁰Две работи гревовите ги намножуваат, а третата предизвикува гнев.

²¹Жешката душа како оган гори; нема да се смири додека не изгори:

²²Оној што блудствува во своето тело, нема да престане сѐ додека огнот не прегори.

²³На блудникот секоја храна му е вкусна; сѐ додека не умре — нема да престане.

²⁴Оној што прељуба прави, во себеси вели: „Кој ќе ме види:

²⁵наоколу темнина, ѕидовите ме сокриваат; никој не ме гледа. Од што ќе се плашам? Севишниот нема да се сети за моите гревови.“

²⁶Само од човечки очи тој има страв,

²⁷а не знае дека очите на Господа десет илјади пати се посветли од сонцето:

²⁸ги гледаат сите човечки патишта, во сите скришни места проникнуваат.

²⁹Нему Му е познато сѐ пред да биде создадено, како и по создавањето.

³⁰Таквиот човек казна ќе го стаса на градските улици, таму каде што и не помислувал. б) жена прељубница

³¹Така и жена, која го оставила мажот свој и од туѓ маж наследник му родила,

³²прво, затоа што не го послушала законот на Севишниот, второ, што на мажот свој му згрешила и, трето, што со прељуба се извалкала и со туѓ маж деца изродила;

³³таа пред собир народен ќе биде изведена и за децата нејзини ќе биде испрашувана.

³⁴Децата нејзини корен нема да пуштат, гранките нејзини не ќе дадат плод.

³⁵По себе ќе остави спомен на проклетство; срамот нејзин нема да се избрише.

³⁶Ќе разберат сите што ќе останат по неа дека од стравот Господов ништо подобро нема и ништо послатко од извршувањето на Божјите заповеди.

³⁷(Голема слава е — да се оди по Господа, а кога си примен од Него — долг живот ќе имаш.)