Read Свето Писмо: Стандардна Библија 2006 (со девтероканонски книги) Сирахова 26 Bible Online

Сирахова 26 - Свето Писмо: Стандардна Библија 2006 (со девтероканонски книги) bible

Сирахова 26

¹Блажен е среќно оженетиот [1] Блазе му на маж што има добра жена; двоен е бројот на неговите денови.

²Добродетелна жена — радост е за својот маж; годините на неговиот живот ќе ги исполни со мир.

³Добрата жена е голем дар; таа ќе му биде дадена на оној што има страв од Господа.

⁴И на добар и на сиромав, додека е со неа, задоволно му е срцето и лицето му е весело во секое време. Чување од жени

⁵Од три работи срцето мое се плаши, а од четвртата се згрозува:

⁶од озборувања во градот, од разбунтуван народ и од лажни обвинувања, зашто сето тоа е полошо од смрт,

⁷но срцева болка и тага — тоа е жена кога е љубоморна на друга жена,

⁸и бичот на јазикот нејзин, што сите ги шиба.

⁹Злата жена е како јарем волски кој се движи натаму-наваму; и кој неа ја зема — тоа е исто како скорпија да фаќа.

¹⁰Жена пијана мака е голема; неизмерлив е тогаш нејзиниот срам.

¹¹Жена блудница се познава по дрскиот поглед и по клепките на очите.

¹²Над ќерка бесрамна засили го надзорот; за да не ја злоупотреби дадената слобода.

¹³Внимавај на бесрамно око; не чуди се ако згреши против тебе;

¹⁴како што од жед измачуван патник што уста отвора и пие секаква вода,

¹⁵така и таа седнува пред секој шатор и на секоја стрела тулот го отвора. Пофалба на совршена жена

¹⁶Љубезна жена радост е на својот маж; нејзината благоразумност коските негови ги зајакнува.

¹⁷Кротка жена е дар од Господа, а добро воспитаниот човек цена нема.

¹⁸Жена срамежлива е благодат изобилна;

¹⁹нема цена достојна за душа непорочна.

²⁰Како сонце што сјае на Божјите висини,

²¹таква е убавината на вредната жена во среденоста на нејзиниот дом.

²²Како свеќа што светлее на свеќникот, таква е убавината на лицето нејзино кога е во возраст зрела;

²³како златни столбови на подножја сребрени, такви се убавите нозе врз нејзините цврсти пети. Три непријатни ситуации

²⁴Две работи срцето мое го жалостат, а од третата гнев ме обзема:

²⁵кога војник страда од немаштија и кога разумните пренебрегнати биваат,

²⁶кога некој од праведност пак на грев се враќа; за таквиот Господ мечот го приготвил. Искушенијата на трговецот

²⁷Трговецот одвај може грешките да ги одбегнува, а крчмарот — да се избави од грев.