Read Свето Писмо: Стандардна Библија 2006 (со девтероканонски книги) Сирахова 27 Bible Online

Сирахова 27 - Свето Писмо: Стандардна Библија 2006 (со девтероканонски книги) bible

Сирахова 27

¹Многумина грешат заради добивка; кој бара богатство — станува немилосрден.

²Колецот се забива меѓу два камена; меѓу продавањето и купувањето гревот се вовлекува.

³Ако некој не го пази страхопочитта кон Господа, набргу куќата ќе му се урне. Човекот се познава по она што го кажува

⁴Кога со решето се отсејува — ѓубре останува; а нечистотијата на човекот — кога тој размислува.

⁵Грнчарските работи фурната ги проверува, а недостатоците на човекот — неговиот говор.

⁶Грижите за дрвото во плодот се покажуваат, а мислите на човекот — во неговите зборови.

⁷Пред да проговори никого не фали; човекот се проверува во неговите зборови. Предностите на мудрото однесување

⁸Ако правдата усрдно ја бараш, ќе ја најдеш; како во облека свечена во неа ќе се облечеш.

⁹Птиците се собираат со оние што ним им се слични; а вистината им се открива на оние што со неа живеат.

¹⁰Како лавот што го демне својот плен, така и гревот ги демне оние што неправда прават.

¹¹Говорот на побожниот секогаш е мудар, а на безумниот се менува како месечината.

¹²Кога си меѓу неразумни, внимавај на времето; меѓу благоразумни поминувај постојано без страв.

¹³Одвратен е разговорот на безумните; а нивната смеа — забава грешна.

¹⁴Празните зборови на оние што многу се колнат, нѐ престрашуваат, а кога се караат, ушите ни ги заглушуваат.

¹⁵Караницата на горделивите е пролевање крв, а навредите нивни се неиздржливи за слухот. Умешноста да се чува тајна

¹⁶Кој открива тајни, доверба загубува; нема веќе да најде пријател по срце.

¹⁷Сакај го пријателот и биди му верен,

¹⁸но ако тајните негови на други ги кажеш, не трчај веќе по него;

¹⁹зашто како човек што го убива непријателот свој, така ти си го убил пријателството со ближниот свој;

²⁰како што се испушта птица од рака, така ти си го испуштил пријателот свој, и никогаш веќе нема да го фатиш.

²¹Не трчај по него, тој е веќе далеку; избегал како што бега срна од примка.

²²Рана може да се преврзе и навреда да се прости,

²³но кој тајна предал — за него надеж нема. Двојното зборување

²⁴Кој намигнува со око — тој смислува зло; никој од тоа нема да го додржи.

²⁵Пред тебе тој ќе говори слатко, ќе ги фали зборовите твои,

²⁶а потоа зад тебе инаку ќе зборува: во твоите зборови соблазна ќе открие.

²⁷Многу работи мразам, но ништо друго како таков човек; него и Господ го мрази. Кој зло прави — зло добива

²⁸Кој угоре фрла камен — на главата му паѓа, а подмолен удар рани ќе отвори.

²⁹Кој јама копа — самиот во неа ќе падне; кој стапица мести — ќе се фати во неа.

³⁰Кој зло прави — со зло му се враќа, иако не знае од каде ќе дојде:

³¹како лав го демнат подбивот, прекорот и одмаздата од гордите.

³²Во стапица ќе се фатат оние што се радуваат на паѓањето на побожните; нив жалост ќе ги истошти — пред да умрат. Подобро да се проштава отколку да се биде злобник

³³И злобата и гневот подеднакво се одвратни, а грешникот нив во себеси ги носи.