Read Свето Писмо: Стандардна Библија 2006 (со девтероканонски книги) Сирахова 3 Bible Online

Сирахова 3 - Свето Писмо: Стандардна Библија 2006 (со девтероканонски книги) bible

Сирахова 3

¹Родители и деца [1] Деца, послушајте ме мене, вашиот татко, и постапувајте така, за да се спасите,

²зашто Господ го прави славен таткото преку неговите деца; Тој го утврдил правото на мајката над нејзините синови.

³Кој го почитува татко си — ќе се очисти од своите гревови,

⁴а кој се однесува со почит кон својата мајка — придобива големо богатство.

⁵Кој го почитува својот татко — ќе има радост од своите деца и во денот на неговата молитва ќе биде слушнат.

⁶Кој го почитува татко си, долго ќе живее, а кој Го слуша Господа, ќе ја успокојува својата мајка.

⁷Кој има страхопочит кон Господа, тој го почитува татко си; на своите родители им служи како на господари.

⁸со дела и со зборови почитувај ги твоите родители, за да бидеш благословен од нив.

⁹Зашто благословот на таткото ги утврдува домовите на децата, а мајчината клетва ги урива до темели.

¹⁰Не барај ја својата слава во срамот на својот татко, зашто срамот на твојот татко не може да биде чест за тебе.

¹¹Славата на човекот доаѓа од честа на неговиот татко, а непристојната мајка е срам за своите деца.

¹²Синко, помогни му на татко ти во неговата старост и не го огорчувај додека е жив.

¹³Ако неговиот ум и ослабнал, биди благ кон него и не го навредувај, кога си во полна сила,

¹⁴зашто не се заборава милоста кон таткото; и покрај сите твои гревови, твојата благосостојба ќе расте.

¹⁵Во деновите на твојата неволја Господ ќе се сети на тебе; како мразот од топлината, така ќе се истопат твоите гревови.

¹⁶Богохулник е оној којшто го остава својот татко, а проколнат од Господа е оној што ја навредува својата мајка. Предностите на скромноста

¹⁷Синко, со кротост врши ги твоите работи, и од богоугоден човек ќе бидеш сакан.

¹⁸Колку си поголем, толку повеќе биди понизен, за да најдеш милост во Господа.

¹⁹Голем е бројот на издигнатите и славни луѓе, но тајните им се откриваат само на смирените.

²⁰Зашто голема е Божјата моќност; Него Го прославуваат понизните.

²¹Не барај го она што е преголемо и претешко за тебе; не истражувај го она што е над твоите сили.

²²Размислувај за она што ти е заповедано; не се занимавај со она што е сокриено од тебе.

²³При многу твои занимања не грижи се за она што ти е непотребно; тебе ти се откриени многу човечки знаења.

²⁴Многумина се воведени во заблуда од нивните претпоставки; лукавите замисли го поколебуваат нивниот ум.

²⁵Кој ги сака опасностите — ќе падне во нив.

²⁶Тврдокорното срце ќе претрпи зло на крајот.

²⁷Упорното срце ќе биде оптоварено со неволји, а грешникот натрупува грев врз грев.

²⁸За болеста на горделивиот нема лек; лоша билка се вкоренила во него.

²⁹Срцето на разумниот размислува за злото; внимателното уво е желба на мудриот. Братско потпомагање

³⁰Водата гасне оган што гори, а милостината чисти од гревови.

³¹Оној што враќа со добро за добрите дела, тој мисли за иднината; во тешко време, ќе најде поткрепа.