Read Свето Писмо: Стандардна Библија 2006 (со девтероканонски книги) Сирахова 32 Bible Online

Сирахова 32 - Свето Писмо: Стандардна Библија 2006 (со девтероканонски книги) bible

Сирахова 32

¹Пристојно однесување на гоштавки [1] Ако те стават за распоредник на трпезата, не вознесувај се; биди меѓу другите како еден од нив.

²Погрижи се за нив, па потоа седни. Кога ќе ја свршиш целата работа, заземи го твоето место,

³за да се веселиш заедно со нив и за твојата префинетост да добиеш венец.

⁴Разговорот води го ти, старешино — зашто тоа и ти прилега, но тоа прави го одмерено и не прекинувај ја музиката.

⁵Кога ќе те слушаат — не говори долго и премногу не мудрувај.

⁶Како печат од рубин, опкован со злато, таква е пријатноста на музиката со вкусно вино.

⁷Како печат од смарагд опкован со злато, таква е пријатноста на песната со вкусно вино.

⁸Кажи, момче, ако затреба, само два збора, и тоа само кога ќе те прашаат.

⁹Кажи го главното, кажи многу со малку зборови; биди како оној што многу знае, а умее да молчи.

¹⁰Кога си со големци, не прави се голем како нив; кога зборува друг, не зборувај ти.

¹¹Пред громот оди секавицата, а пред скромниот човек — оди милоста.

¹²Навреме станувај и не биди последен; побрзај дома и не застанувај.

¹³Таму забавувај се и прави сѐ што сакаш, но со срамен збор не греши.

¹⁴А за сето ова Создателот прославувај Го; Тој те наситува со сите добрини. ЧЕТВРТА ЗБИРКА ОД ПОУКИ Почитување на Бога

¹⁵Кој од Бога страв има — тој и поука прима; кој од рано утро Него Го бара — благослов од него добива.

¹⁶Кој законот го бара — со него се исполнува; а лицемерот од него ќе се сопне.

¹⁷Оние што страв од Господа имаат, ќе бидат оправдани. Нивните добри дела како светлина ќе засветлат.

¹⁸Грешникот од изобличување бега; според своите желби — извинување бара.

¹⁹Разумен човек не презира совет, а неразумен и горделив не знае за страв, дури и тогаш кога неразумно постапил.

²⁰Без размислување не прави ништо, а кога ќе направиш нешто, не кај се.

²¹По пат опасен не оди, за да не се препнеш и да паднеш.

²²Не верувај му многу и на рамен пат;

²³немај доверба ни во своите деца.

²⁴Во сите твои дела верувај ѝ на својата душа; тоа е извршување на заповедите.

²⁵Кој во законот верува, на неговите заповеди се покорува, и на Господа кој се надева, зло нема да претрпи.