Read Свето Писмо: Стандардна Библија 2006 (со девтероканонски книги) Сирахова 35 Bible Online

Сирахова 35 - Свето Писмо: Стандардна Библија 2006 (со девтероканонски книги) bible

Сирахова 35

¹Жртвите [1] Кој законот го извршува, тој жртвите ги умножува, а кој заповедите ги држи — жртви за спасение принесува.

²Кој благодари, брашнени жртви прави, а кој прави милостина — пофална жртва принесува.

³На Бога да Му угодуваме — значи од злото да се оддалечуваме, а Бога да Го умилостивиме — значи од неправда да отстапиме.

⁴Со празни раце не излегувај пред Господа; сето тоа е според заповедта.

⁵Жртвата на праведникот го украсува жртвеникот, а пријатниот мирис оди пред Севишниот.

⁶Од побожен човек угодна е жртвата, и споменот за неа нема да се заборави.

⁷Со око весело прославувај Го Господа, не намалувај ги првините што ги принесуваш.

⁸При секој дар лицето нека ти е весело; со радост десетокот давај го.

⁹Давај Му на Севишниот како Тој тебе што ти дава — штедро и колку што можеш.

¹⁰Зашто Господ плаќа и седморно враќа. Праведен Судија

¹¹Не намалувај ги даровите, зашто нема да ги прими; не надевај се на неправедна жртва.

¹²Господ е судија и на лице не гледа.

¹³Тој е од страната на сиромавиот; молитвата на навредените ја слуша.

¹⁴На сиракот молитвата нема да ја презре, ниту на вдовицата кога мака своја искажува.

¹⁵Не течат ли солзи по лицето на вдовицата, не го обвинуваат ли оној што ги предизвикува?

¹⁶Кој со сето срце на Бога Му служи, ќе биде услишен; неговите молитви до облаците ќе стигнат.

¹⁷Молитвата на понизен низ облаци ќе мине; додека до Бога не стигне — нема да се утеши;

¹⁸нема да отстапи додека Севишниот со милост не погледне, праведно не пресуди и правда не донесе.

¹⁹И Господ нема да задоцни, нема да се колеба, додека не ги сотре бедрата на насилниците,

²⁰сѐ додека не им се одмазди на народите, додека не го истреби собирот на угнетувачите и не им ги скрши скиптрите на неправедните.

²¹Додека на сите не им плати според нивните дела и според нивните намери;

²²додека на народот Свој, не му пресуди и не го израдува со Својата милост.

²³Добра е милоста во време на жалост — како дождовните облаци во време на суша.