Read Свето Писмо: Стандардна Библија 2006 (со девтероканонски книги) Сирахова 36 Bible Online

Сирахова 36 - Свето Писмо: Стандардна Библија 2006 (со девтероканонски книги) bible

Сирахова 36

¹Молитва за Божјиот народ [1] Смилувај се, Господи, Боже на сите, и милостиво погледај на нас,

²на сите народи испрати им го стравот Твој.

³Подигни ја Твојата силна рака против туѓите народи, за да ја познаат твојата моќ.

⁴Како што ја покажа пред нив светоста Своја во нас, така и сега покажи го пред нас Своето величие во нив,

⁵па нека познаат, како што познаваме ние, дека нема друг Бог освен Тебе, Господи;

⁶обнови ги знаменијата, повтори ги чудата;

⁷прослави ја раката Твоја и десницата Твоја, лутината издигни ја и излиј го гневот Твој,

⁸собори го противникот и уништи го непријателот.

⁹Побрзај го времето и за клетвата спомни си, нека се слават Твоите големи дела.

¹⁰Со жесток оган нека бидат изгорени оние коишто преживеале, мачителите на народот Твој во пропаст нека појдат.

¹¹Скрши им ги главите на туѓинските главатари, коишто велат: „Никој нема освен нас!“

¹²Собери ги сите племиња Јаковови и направи ги наследство Твое, како што било на почетокот.

¹³Смилувај се, Господи, на народот именуван според името Твое, и Израил, кој првенец го нарече.

¹⁴Смилувај се над градот на Твојата светиња, над Ерусалим — место на спокојот Твој.

¹⁵Исполни го Сион со похвалите на Твоето ветување, а со славата Твоја — народот Твој.

¹⁶Сведоштво дај им на оние, коишто од почетокот беа наследство Твое и исполни ги пророштвата, објавени во Твое име.

¹⁷Награди ги оние што се надеваат на Тебе и Твоите пророци да влеваат верба.

¹⁸Господи, послушај ја молитвата на Твоите слуги спрема благословот на Арон, за народот Твој.

¹⁹Та сите што живеат на земјата да познаат дека си Ти Господ, вечниот Бог. Препознавање на подоброто

²⁰Стомакот прима секаква хрна, но едно јадење повкусно е од друго.

²¹Непцето распознава јадења од дивеч; а разумното срце — зборови лажливи.

²²Лукаво срце болки задава, но искусниот знае како да му возврати. Избирање на жена

²³Жена прима секаков маж, но има девојка подобра од друга.

²⁴Убавината на жената го весели лицето на човекот; и тоа најмногу го сака мажот.

²⁵Ако јазикот нејзин има нежност и кротост, мажот ѝ не е како другите луѓе.

²⁶Кој се здобил со жена, тој почнува да создава имот: таа му е помошник и потпорен столб во спокојството.

²⁷Каде нема ограда — се разграбува имотот; кој жена нема — талка и воздивнува,

²⁸кој ќе му верува на вешт разбојник што талка од град во град?

²⁹Така е и со човекот кој постојано живеалиште нема, а ноќева таму каде што се најде.