Read Свето Писмо: Стандардна Библија 2006 (со девтероканонски книги) Сирахова 39 Bible Online

Сирахова 39 - Свето Писмо: Стандардна Библија 2006 (со девтероканонски книги) bible

Сирахова 39

¹Предностите на законоучителот [1] Само оној што душата своја ја посветил на размислување за законот на Севишниот, тој ја бара древната мудрост и се занимава со пророштва.

²Тој ги помни зборовите на славните луѓе и проникнува во смислата на нивните мисли.

³Тој го проучува сокриеното значење на зборовите и се бави со тајните на загатките.

⁴Меѓу големци ќе служи, со владетели ќе се среќава;

⁵ќе патува по земјите на други народи, зашто искусил и добро и зло меѓу луѓето.

⁶Уште в зори срцето свое кон Господа го издигнува, Кој го создал, се моли пред Севишниот; ја отвора устата своја на молитва и моли милост за своите гревови.

⁷Ако е тоа волја Божја, го исполнува со дух на разум;

⁸зборови на мудрост тој исипува и со молитвата своја Го прославува Господа;

⁹добро ќе го управи умот свој и волјата и ќе размислува за тајните на Господа;

¹⁰ќе ја изложува мудроста на своето учење и ќе се фали со законот на Божјиот завет.

¹¹Многумина ќе го прославуваат неговото знаење и никогаш нема заборавен да биде;

¹²споменот за него нема да згасне, името негово вечно ќе живее.

¹³Народите мудроста негова ќе ја слават и заедницата ќе го фали;

¹⁴додека е жив од илјадници луѓе пославен ќе биде, а и кога почине — пак славен ќе биде. Бог добро прави

¹⁵Откако размислив, пак ќе ви зборувам; бидејќи сум исполнет со мисла како полна месечина.

¹⁶Слушајте, побожни деца, и растете како ружа што расте покрај буен поток.

¹⁷Како од темјан пријатна миризба давајте.

¹⁸Цутете како кринови, пријатна миризба ширете и песни пејте;

¹⁹благословувајте Го Господа во сите Негови дела, името Негово славете Го, огласувајте ја похвалата Негова;

²⁰со песни и харфи, прославувајте Го и велете:

²¹„Колку се величествени делата на Господа; секоја Негова повелба навреме ќе се исполни!“

²²Не треба да прашуваме: „Што е она и зошто е вака?“ Во свое време сѐ ќе се открие.

²³По Неговиот збор — водата како купиште стана, по заповед на устата Негова водата се смести.

²⁴Во заповедите Негови — волјата е Негова; никој не може нивната спасителност да ја намали.

²⁵Пред Него се делата на сите; не можеме да се сокриеме од Неговите очи.

²⁶Тој гледа низ целата вечност; ништо не е необично пред неговите очи.

²⁷Не треба да прашуваме: „Што е ова и зошто е вака?“ — Сѐ што е создадено, своја цел има.

²⁸Неговиот благослов се прелива како река; како поплава земјата ја напојува.

²⁹И гневот Негов народите го чувствуваат, како некогаш водите во сол што ги претвори.

³⁰Патиштата Негови прави се за праведниците; а непроодни се за грешниците.

³¹Од почеток доброто за добрите е создадено, а злото — за лошите.

³²Основните потреби за животот на човекот се: водата, огнот, железото и солта, пченичното брашно, медот, млекото, виното, маслото и облеката.

³³Сето ова им служи за добро на добрите, а за грешниците во зло може да се претвори.

³⁴Има ветрови за казна определени, создадени се како бичеви на Неговиот гнев;

³⁵кога тие се во устрем — силата Негова ја пројавуваат; го смируваат гневот на Создателот свој.

³⁶Огнот и градот, гладот и смртта — за казна се создадени;

³⁷забите на ѕверовите, скорпиите, змиите и мечот кој одмаздува за пропаст на безбожниците.

³⁸На Неговата заповед ќе се зарадуваат, подготвени ќе бидат на земјата и кога ќе бидат потребни — ќе ја слушаат Неговата заповед.

³⁹Затоа од самиот почеток одлучив, размислив и во книга запишав: —

⁴⁰„Прекрасни се сите дела Господови — Тој навреме ни дава сѐ што ни е потребно;

⁴¹не треба да се рече: ‚Ова е полошо од она‘, зашто сѐ во свое време ќе биде признато за добро.

⁴²А сега, со полно срце и полна уста запејте и благословувајте Го името на Господа.“