Read Свето Писмо: Стандардна Библија 2006 (со девтероканонски книги) Сирахова 51 Bible Online

Сирахова 51 - Свето Писмо: Стандардна Библија 2006 (со девтероканонски книги) bible

Сирахова 51

¹Молитва на Исус, синот Сирахов [1] Господи Царе, Тебе ќе Те воспевам, Тебе ќе Те фалам — мојот Бог и Спасител, Твоето име ќе Го прославувам;

²Ти беше мој закрилник и помошник;

³Ти го спаси моето тело од пропаст и од примките на јазик клеветнички и уста лажлива; Ти беше мој помошник против оние што стануваа против мене.

⁴Ти ме избави според Твојата голема милост и заради името Свое од заби што крцкаат спремни да ме изедат;

⁵и од рацете на оние што ја бараа мојата душа и од многуте жалости што ги имав.

⁶Од оган, којшто ме задушуваше од сите страни и од пламенот што не ме изгоре;

⁷од длабината на адовата утроба, од нечист јазик и лажливи зборови, од клевета на неправеден јазик пред цар.

⁸Душата моја близу до смртта беше.

⁹Животот мој — до дното на пеколот:

¹⁰од сите страни ме опкружуваа и немаше кој да ми помогне; од луѓе помош со поглед барав, но ја немаше.

¹¹Тогаш си спомнав за милоста Твоја, Господи, и за делата Твои уште од почеток,

¹²дека ги спасуваш оние што на тебе се надеваат, ги спасуваш од непријателски раце.

¹³Гласот на мојата молитва од земја го подигнав, Ти се молев од смрт да ме избавиш.

¹⁴Повикав кон Господа, кон Отецот на мојот Господ — да не ме остави во дни на неволја кога немам помош од горделиви луѓе.

¹⁵Името Твое непрестајно во славословие ќе го фалам, зашто молитвата моја ја послуша;

¹⁶од погибел ме спаси и во зло време ме избави.

¹⁷Затоа ќе Те воспевам и ќе Те фалам и името на Господа ќе го прославувам. Потрага по мудроста

¹⁸Уште како момче, пред да почнам да патувам, во молитвата моја отворена мудрост барав;

¹⁹пред храмот се молев за неа и докрај ќе ја барам, како од цутот на грозјето до неговото узревање,

²⁰така срцето мое се радува од неа; мојата нога по прав пат тргна, уште од младоста по неа одам.

²¹Го наведнував по малку увото и неа ја примав; во неа наоѓав многу поуки за себе.

²²Напредував во неа.

²³Ќе го прославувам оној, Кој ми ја дарува мудроста.

²⁴Одлучив да одам по неа; го следев доброто и нема да се посрамам.

²⁵Душата моја неа ја бараше, а во делата мои бев исправен.

²⁶Рацете мои ги подигнав кон висините и ја осознавав својата неукост.

²⁷Кон неа душата моја ја управив и од самиот почеток ѝ го предадов срцето свое,

²⁸и со чистота ја достигнав; затоа нема да бидам оставен од неа.

²⁹Внатрешноста моја се подигна неа да ја бара; затоа придобив вредно богатство.

³⁰За награда Господ јазик ми даде; со него ќе Го прославувам.

³¹Дојдете кај мене, вие ненаучените, во училиштето мое бидете.

³²Зашто вам мудроста ви е потребна, душите ваши силно жеднеат за неа.

³³Ја отворам устата своја и ви велам: „Купувајте ја без пари“;

³⁴ставете го вратот свој во јаремот нејзин и душата ваша нека го прима ова учење; него можете близу да го најдете.

³⁵Ете, со ваши очи гледате: јас малку се потрудив и голем спокој најдов.

³⁶Придобивајте поуки колку за големо количество сребро, а со тоа ќе добиете богатство поголемо од злато.

³⁷Нека се радува душата ваша за Неговата милост; и не срамете се да Го прославувате.

³⁸Свршувајте ја работата своја навреме, и Тој навреме ќе ви ја даде вашата награда.