Read Свето Писмо: Стандардна Библија 2006 (со девтероканонски книги) Сирахова 7 Bible Online

Сирахова 7 - Свето Писмо: Стандардна Библија 2006 (со девтероканонски книги) bible

Сирахова 7

¹Различни совети [1] Не прави зло, и зло нема да те постигне;

²бегај од неправда и неправдата ќе избега од тебе.

³Синко, не сеј во браздите на неправдата, за да не ожнееш од нив седумпати повеќе.

⁴Не барај од Господа власт, ниту од царот — место почесно.

⁵Не оправдувај се пред Господа и пред царот — не мудрувај.

⁶Не барај да станеш судија, за да не се покажеш немоќен да ја уништиш неправдата, да не се уплашиш од силниот и сенка да не фрлиш врз својата правичност.

⁷Не греши пред собирот на граѓаните да не се понижиш пред народот.

⁸Не притурај грев врз грев, зашто ни за еден од нив нема да останеш неказнет.

⁹Не вели: „Ќе погледне Бог благонаклоно на многуте мои дарови; ќе ги прими — кога ќе Му ги принесам.“

¹⁰Не биди малодушен во твојата молитва и не занемарувај ја милостината.

¹¹Не подбивај се со оној што душевно страда, зашто Кој понижува, Тој и возвишува.

¹²Не измислувај лага против својот брат; не прави му го тоа — ни на пријателот твој.

¹³Бегај од секаква лага; од неа нема никакво добро.

¹⁴На собир на постари не зборувај многу, и не повторувај ги зборовите во твојата молитва.

¹⁵Не бегај од тешка работа; не бегај ни од земјоделскиот труд; тој е заповедан од Севишниот.

¹⁶Не присоединувај се кон мноштвото на грешниците.

¹⁷Длабоко понизи ја својата душа.

¹⁸Помни дека гневот не задоцнува;

¹⁹казна за грешникот се огнот и црвите. Пријателите, семејството

²⁰Не менувај пријател за богатство, ниту роден брат — за офирско злато.

²¹Не оставај мудра и добра жена; достоинството нејзино — поскапоцено е од злато.

²²Не навредувај слуга што се труди чесно, ни наемник што ти служи верно.

²³Душата твоја нека го сака разумниот слуга; не ограничувај му ја слободата.

²⁴Имаш ли добиток, пази го, а ако ти е од полза — зачувај го.

²⁵Ако имаш синови, поучувај ги; од малечки свикнувај ги на послушност.

²⁶Ако имаш ќерки, грижи се за нивната чесност; не биди премногу добар со нив;

²⁷омажи ја твојата ќерка и со тоа ќе направиш големо дело; подари ја на разумен маж.

²⁸Ако имаш жена што ти е по твоето срце, не гони ја од себе, а ако ти е омрзната, немај многу верба во неа.

²⁹Почитувај ги татко ти и мајка ти со сето свое срце и не заборавај ги родилните болки на твојата мајка.

³⁰Помни дека од нив си роден; што можеш да им дадеш за сето она што го направиле за тебе? Должноста кон свештениците

³¹Со сета твоја душа почитувај Го својот Господ и почитувај ги неговите свештеници.

³²Со сета твоја сила почитувај Го својот Создател и не оставај ги Неговите служители.

³³Имај страв од Господа и почитувај го свештеникот; дај му го неговиот дел, како што ти е заповедано:

³⁴И првините и за грев и давањето плешка, и жртвата за осветување и првите плодови за светиите. Должноста кон сиромашните

³⁵И кон сиромав пружај ја раката своја, та благословот твој да биде совршен.

³⁶Биди милостив спрема секое живо создание; но и умрените не лишувај ги од милост.

³⁷Не бегај од оние што плачат, туку тагувај заедно со нив.

³⁸Не биди мрзлив да ги посетуваш болните; за тоа ќе бидеш сакан.

³⁹Во сите твои работи спомнувај си за твојот крај, и никогаш нема да згрешиш.