Read Свето Писмо: Стандардна Библија 2006 (со девтероканонски книги) Исаија 26 Bible Online

Исаија 26 - Свето Писмо: Стандардна Библија 2006 (со девтероканонски книги) bible

Исаија 26

¹Во тој ден ќе биде испеана во земјата Јудина оваа песна: „Градот ни е јак, место ѕидини и опкопи Бог ни даде спасение.

²Отворете ги портите; нека влезе праведниот народ, кој ја пази вистината.

³Цврстиот по дух Ти го пазиш во совршен мир, зашто на Тебе се надева.

⁴Надевајте се на Господ засекогаш, зашто Господ Бог е вечната тврдина;

⁵Тој ги собори оние, што живееја на високо; градот, што стоеше високо го собори, го кутна на земја, го фрли во прав.

⁶Нога го гази, нозете на сиромавиот, стапките на бедните.“

⁷Патот на праведниот е прав; Ти ја израмнуваш неговата патека.

⁸На патот на Твоите судови, Господи, ние на Тебе се надеваме; душата наша се стреми кон Твоето име и кон споменот за Тебе.

⁹Со душата своја се стремиме кон Тебе ноќе, и со духот свој ќе Те бараме искрено од рани зори; зашто, кога Твоите пресуди се извршуваат на земјата, тогаш жителите на светот се учат на правда.

¹⁰Ако нечесен биде помилуван, тој нема да се научи на правда, ќе злодејствува во земјата на праведните и нема да погледне на величието Господово.

¹¹Господи! Раката Твоја беше високо крената, но тие не ја видоа; ќе видат и ќе се посрамат оние, што го мразат Твојот народ; оган ќе ги голтне Твоите непријатели.

¹²Господи! Ти ни даруваш мир, зашто и сите наши дела Ти ги уредуваш за нас.

¹³Господи, Боже наш! Други господари, освен Тебе, владееле над нас; но само преку Тебе ние го славиме Твоето име.

¹⁴Мртвите нема да оживеат; нивните сенки нема да станат, зашто Ти ги казни и истреби, го уништи секој спомен за нив.

¹⁵Ти го намножи народот, Господи, го намножи народот. Се прослави Себе Си, ги рашири сите земни граници.

¹⁶Господи, кога беа во беда, тие Те бараа; изливаа тивки молитви, кога ги стигнуваше Твојата казна.

¹⁷Како трудна жена, кога ќе раѓа, се мачи, вика од болки, така бевме ние пред Тебе, Господи.

¹⁸Бевме трудни, се мачевме, но родивме само ветар; спасение не ѝ донесовме на земјата, и други жители во вселената не се појавија.

¹⁹Твоите мртовци ќе оживеат, мртвите тела ќе воскреснат! Разбудете се и ликувајте вие, соборените во прав; зашто Твојата роса е роса на светлина, и земјата ќе ги даде мртовците.

²⁰Ајде народе Мој, влези во покоите свои и затвори ги зад себе вратите свои, сокри се за миг, додека да мине гневот (Господов);

²¹зашто, ете, Господ излегува од Своето живеалиште да ги казни жителите земни за нивното беззаконие, и земјата ќе ја открие голтнатата од неа крв и повеќе нема да ги крие своите убиени.