Read Свето Писмо: Стандардна Библија 2006 (со девтероканонски книги) Исаија 42 Bible Online

Исаија 42 - Свето Писмо: Стандардна Библија 2006 (со девтероканонски книги) bible

Исаија 42

¹Еве го Мојот Слуга, Кого Го поддржувам, Мојот Избраник, љубимецот на душата Моја. Ќе Го положам Духот Свој врз Него, и Тој ќе им донесе правда на народите;

²нема да викне, ниту да го подигне гласот Свој, нема да дозволи да го чујат на улиците;

³скршената трска нема да ја здроби, и чадливата ламба нема да ја угасне; ќе суди според вистината;

⁴нема да ослабне, ниту ќе изнемошти, додека на земјата не воспостави правда, народите ќе се надеваат на Неговиот закон.

⁵Така вели Господ Бог, Кој ги создал небесата и нивното пространство, Кој ја раширил земјата со нејзините производи, Кој му дава здив на народот што е на неа, и дух на оние што одат по неа.

⁶Јас, Господ, Те повикав во правда, цврсто ќе Те држам за рака и ќе Те пазам, ќе те поставам за завет на народот, светлина за незнабошците,

⁷за да им ги отвориш очите на слепите, да ги изведеш врзаните од затвор и оние што седат во темнина — од темнината.

⁸Јас сум Јахве, тоа е Моето име, и нема да ја дадам славата Своја на друг, ниту честа Своја на идоли.

⁹Ете, претскажаното порано се збидна, и ново ќе ви објавам; пред да стане тоа, Јас ќе ви го објавам.

¹⁰Пејте Му на Господ нова песна, похвала за Него од земните краишта, вие што пловите по море, и сѐ што го полни, островите и оние што живеат на нив.

¹¹Нека издигне глас пустината и нејзините градови, населбите, каде што живеат Кедарци; нека ликуваат оние што живеат во Сала, нека воскликнуваат од врвовите планински.

¹²Нека Му оддадат слава на Господ, похвалата Негова нека ја разгласат по островите.

¹³Господ ќе излезе како јунак, ревноста ќе ја побуди како војник; ќе извика и ќе подигне војнички вик; ќе се покаже силен против непријателите Свои.

¹⁴Долго молчев Јас, трпев и се воздржував; сега ќе викам како родилка, ќе се забревтам и ќе голтам сѐ.

¹⁵Ќе опустошувам планини и ридови, и сета нивна трева ќе ја исушам; реките ќе ги направам острови, езерата ќе ги исушам.

¹⁶Ќе ги поведам слепите по пат, што тие не го знаат, ќе ги водам по нејзини патеки, темнината ќе ја претворам во светлина пред нив, а кривите патеки — прави: ете, што ќе направам Јас за нив, и нема да ги оставам.

¹⁷Тогаш ќе отстапам и со голем срам ќе се покријат оние, што се надеваат на идоли, кои им велат на идолите: вие сте наши богови.

¹⁸Слушајте, глуви, и гледајте, слепи, за да видите.

¹⁹Кој е толку слеп како што е Мојот слуга, и глув, како што е Мојот пратеник? Кој е толку слеп како што е возљубениот, кој е така глув, како што е слугата Господов?

²⁰Ти си видел многу, но не си забележувал; ушите ти биле отворени, но не си слушал.

²¹На Господа Му било угодно заради правдата Своја да го возвеличи и прослави Законот Свој.

²²Но тоа е народ поробен и разграбен; сите тие се врзани во подземја и сокриени во темници; станале плен, и нема спасител, ограбени се, и никој не вели: врати го!

²³Кој од вас пројавил слух за тоа, кој внимава и слуша за иднината?

²⁴Кој го предаде Јаков на разурнување и Израил — на грабачи? Не е ли тоа Господ, против Кого згрешивме, по Чии патишта не сакавме да одиме и Чиј Закон не го слушавме?

²⁵А Тој ја излеа врз нив јароста на Својот гнев и стравотиите на војната: Ти ги опкружи со пламен од сите страни, но тие не забележуваа; ги изгоре, но тие ни тоа не го сфатија сериозно.