Read Свето Писмо: Стандардна Библија 2006 (со девтероканонски книги) Левит 11 Bible Online

Левит 11 - Свето Писмо: Стандардна Библија 2006 (со девтероканонски книги) bible

Левит 11

¹И им рече Господ на Мојсеј и на Арон, велејќи:

²„Кажете им на синовите на Израил и речете им: ова се животните што ги има на земјата, кои можете да ги јадете —

³секое животно што има раздвоени копита и длабок рез меѓу копитата, и кое прежива, тоа да го јадете.

⁴Од оние што преживаат или имаат раздвоени копита, не јадете ги само овие: камилата, бидејќи таа прежива, но нема и раздвоени копита; таа е за вас нечиста.

⁵И питом зајак, бидејќи прежива, но нема раздвоени копита, нечист е за вас,

⁶и див зајак кој прежива, а нема раздвоени копита, нечист да биде за вас,

⁷и свињата, бидејќи има раздвоени копита и длабок рез меѓу копитата, но не прежива — нечиста е таа за вас.

⁸Од месото нивно да не јадете, ниту, пак, мршите нивни да ги допирате — тие се за вас нечисти.

⁹А од сѐ она, пак, што е во вода ова јадете го: — сѐ што има перки и лушпи во водата, во морињата и во реките, јадете го.

¹⁰Она, пак, што нема перки и лушпи во водата, во морињата и во реките, меѓу она што плива по вода и живее во вода, одвратно да биде за вас.

¹¹Тие треба да бидат за вас одвратни: од месото нивно да не јадете и од труповите нивни да се гнасите.

¹²Сѐ што нема перки и лушпи во водата, тоа да ви е нечисто.

¹³А меѓу птиците гнасете се од овие: орелот, грифот, галебот; одвратни да бидат за вас, не јадете ги;

¹⁴и јастребот, и соколот од кој било вид,

¹⁵и секаков гавран од кој било вид;

¹⁶нојот, ластовицата, кукавицата со нивните видови;

¹⁷бувот, корморанот и ибисот;

¹⁸и лебедот, и чавката, и пеликанот,

¹⁹и штркот, и чапјата и слични на нив, и пупунецот и лилјакот;

²⁰и сите крилести гадинки што одат на четири нозе, да ви се одвратни.

²¹Но од сѐ она што има крилја и оди на четири нозе, а има и колена на нозете свои, за да скока по земјата, јадете.

²²Од нив јадете ги само овие: скакулците и сличните на нив, соламот со сите негови видови, арголата и сличните на неа, и агавата од кој било вид.

²³Сѐ друго што има крилја и оди на четири нозе одвратно да ви е; со тоа да не се осквернувате.

²⁴Од нив ќе станувате нечисти: секој кој ќе се допре до нивно пцовисано тело, нечист ќе биде до вечерта.

²⁵И секој кој ќе носи нивно пцовисано тело да ја испере својата облека и нечист ќе биде до вечерта.

²⁶Секое животно што има нераздвоени копита, но нема длабок рез меѓу копитата или не прежива, нечисто да биде за вас; секој кој ќе се допре до такво, нечист ќе биде (до вечер).

²⁷И сѐ што оди на лапите свои, меѓу сите четвороножни животни, нечисто да ви е; кој ќе се допре до трупот нивни, нечист ќе биде до вечерта.

²⁸И кој ќе понесе труп нивни пцовисан, нека ја испере облеката своја и нечист е до вечерта; тие да ви бидат одвратни.

²⁹А меѓу животните што лазат по земја да ви бидат нечисти: невестулката, глушецот и желката со нејзините видови

³⁰и ежот и крокодилот, и гуштерот, и полжавот, и кртот.

³¹Тие да ви се нечисти меѓу животните што лазат по земјата, и кој ќе се допре до нив пцовисани, нечист да е до вечерта.

³²И секој предмет на кој ќе падне нешто од нив пцовисано, ќе биде нечист, било да е сад дрвен или облека или кожа или вреќа, и секој предмет што е потребен за некоја употреба, да се стави во вода и ќе биде нечист до вечерта; потоа ќе биде чист.

³³А и секој сад земјен, во кој ќе падне нешто од тоа, и сѐ што ќе е во него, ќе биде нечисто, а садот скршете го.

³⁴И секое јадење што го јадете, ако на него се излее вода од таков сад, ќе биде нечисто (за вас); и секое питие што се пие во секој таков сад, ќе ви биде нечисто.

³⁵И сѐ на што ќе падне нешто од нивните пцовисани тела нечисто ќе е; и печката и огништето нека се растурат, зашто се нечисти, и нечисти ќе ви бидат.

³⁶Само изворот, бунарот, каде што се собира водата, ќе бидат чисти; но кој се допре до пцовисан труп, ќе биде нечист.

³⁷Ако нешто, пак, од пцовисан труп падне на семе, што се сее, тоа ќе ви биде чисто.

³⁸Но ако на семето се излее вода, па тогаш падне нешто од пцовисан труп на семето, тоа да ви биде нечисто.

³⁹И кога ќе пцовиса каков и да е добиток од оној што го јадете, ако некој се допре до неговиот труп, нечист ќе биде до вечерта.

⁴⁰А оној што ќе јаде од трупот негов, нека ја испере облеката своја и нечист ќе биде до вечерта; и кој ќе носи нивни пцовисан труп, нека ја испере облеката своја и нечист ќе биде до вечерта.

⁴¹И секаква гадинка што лази по земјата, да ви е одвратна и да не се јаде.

⁴²Сѐ што се влече на мев и сѐ што оди на четири нозе или што е со многу нозе меѓу сѐ она што се влече по земјата, тоа да не го јадете, бидејќи е нечисто.

⁴³Не поганете ги душите ваши со ниедно од животните што лазат и не осквернувајте се од нив, за да не станете нечисти преку нив,

⁴⁴зашто Јас сум Господ, вашиот Бог, осветувајте се и бидете свети, бидејќи Јас сум свет; и немојте да ги осквернувате душите ваши со какво и да е животно што лази по земјата.

⁴⁵Бидејќи Јас сум Господ што ве изведе од земјата египетска, за да ви бидам Бог; и така — бидете свети, зашто Јас сум свет.

⁴⁶Тоа е закон за добитокот и за птиците, и за секоја жива душа што се движи во вода, и за секое животно што лази по земја,

⁴⁷за да се распознава нечистото од чистото и животните што можат да се јадат од животните што не треба да се јадат.“