Read Свето Писмо: Стандардна Библија 2006 (со девтероканонски книги) Левит 21 Bible Online

Левит 21 - Свето Писмо: Стандардна Библија 2006 (со девтероканонски книги) bible

Левит 21

¹И пак му рече Господ на Мојсеј, велејќи: „Кажи им на свештениците, синовите Аронови, и речи им да не се допираат до мртовец од народот свој.

²Само до свој близок роднина: до мајка, до татко, до син и до ќерка, до брат,

³до сестра, која е мома што живее кај него, немажена, може да се допира, и со тоа да не се осквернува;

⁴инаку, не смее да се оскверни со допир до кого и да било од народот свој, за да не стане нечист.

⁵Не смеат да ја бричат главата своја, ниту да го потстрижуваат крајот од брадата своја, ни да прават зарези по телото свое.

⁶Тие треба да бидат свети пред својот Бог и да не го осквернуваат името на својот Бог, бидејќи тие Му принесуваат жртви на Бога, леб на својот Бог, и затоа треба да бидат свети.

⁷Тие не смеат да земаат жени блудници и порочни, не смеат да се женат ни со жена истерана од својот маж, затоа што се тие свети пред својот Бог.

⁸И свет нека ти биде, бидејќи тој Му принесува храна на Господ, вашиот Бог; тој треба да ти биде свет, затоа што сум свет Јас, Господ Бог ваш, Кој ве осветува.

⁹Ако свештеничка ќерка се оскверни со блудство, таа го осквернила таткото свој: со оган да биде изгорена.

¹⁰А големиот свештеник меѓу браќата свои, врз чија глава е излеано масло за помазание, и кој е осветен за да се облекува во свети одежди, да не ја открива главата своја и облеката своја да не ја кине;

¹¹и до никаков мртовец да не приоѓа; да не се осквернува со допир ни до умрениот татко свој, ни до мајката своја.

¹²Тој од светилиштето да не се оддалечува за да не го оскверни светото на својот Бог, зашто светото масло на Божјото помазание е врз него. Јас сум Господ.

¹³За жена тој треба да зема девица (од својот народ);

¹⁴не смее да зема вдовица или оставена или осквернета (или) блудница, туку само девица од родот свој тој треба да зема за жена.

¹⁵И да не го осквернува своето потомство во народот свој: затоа што сум Јас Господ, Кој го осветува.“

¹⁶И му рече Господ на Мојсеј, велејќи:

¹⁷„Кажи му на Арон: никој од твоето семе во сите родови, кој има телесен недостаток, да не пристапува да Му принесува дар на својот Бог.

¹⁸Никој, кој има телесен недостаток, да не пристапува; ни слеп човек, ниту куц, ниту, пак, со чпртав нос, или со деформирани крајници,

¹⁹ниту таков кому му е раката скршена или ногата скршена,

²⁰ниту грбав, ниту слабуњав, ниту со перде на очите, ни крастав или со лишај, ниту скопец.

²¹Никој човек од родот на свештеникот Арон, кој е со телесен недостаток, не смее да пристапува за да Му принесува жртва на Господ; бидејќи има недостаток, нека не пристапува да принесува дарови Божји,

²²но од храната на својот Бог, од осветените жртви, тој може да јаде;

²³само до завесата да не се доближува и до жртвеникот да не пристапува, затоа што има недостаток: да не го оскверни светилиштето Мое, бидејќи Јас сум Господ, Кој ги осветува.“

²⁴И Мојсеј им го соопшти тоа на Арон и на синовите негови и на сите синови израилски.